Манзурадан жўшқин кайфиятдаги янги тарона

Ижтимоий тармоқлардаги фаоллик бўйича етакчи ўринда турувчи Манзура “Замон билан ҳамнафас” ғояси ила турли кутилмаган туҳфалар ҳадя этишда давом этмоқда. 

Навбатдаги туҳфа ҳам ана шундай оммавий ва замонавий талқинда тақдим этилди. 17-июль куни “Ўзбегим Таронаси” радиосида мухлислар томонидан интиқлик билан кутилган “Севги синов” қўшиғи премьера қилинди. Позитив руҳ ва кайфият баҳш этувчи янги тарона ўлмас мавзу – муҳаббатга бағишланган таронада бу туйғу ўзгача тараннум этилган. Қўшиқ янграшни бошлаши биланоқ аввало мусиқаси тингловчи эътиборини тортади. Бобур Умаров басталаган куйга Жасур Бадалбоев мусиқий сайқал берди. Шахсан Манзуранинг кўнглига ҳам маъқул келган мазкур тарона матни Гавҳар Шарипова қаламига мансуб.

Қўшиқ илк марта ФМ 101.00 тўлқини узра жаранг сочгач, анъанага кўра тингловчилар фикри қабул қилинди. Тарона ва Манзура ижроси тингловчилар томонидан аъло баҳога лойиқ топилди. Ҳақиқаттан ҳам ёз мавсумига хос жўшқинлик ила яратилган тарона тингловчи юрагига тезда ўрнашиб олиши, мусиқий жавонидан мустаҳкам жой эгаллаши турган гап. 

Яқинда мазкур қўшиққа видеоклип ҳам суратга олинди. Наримон Султонходжаев режиссёрлигида ва операторлигида тасвирга олинган клипда Манзура ўзгача кўринишда намоён бўлишини маълум қилгандик. Тез кунларда янги ижод намунасидан баҳраманд бўлишингиз мумкин. 

Манзуранинг янги “Севги синов” таронасини ҳозироқ попкорн.уз сайтига ташриф буюрган ҳолда тинглаб, муносиб баҳо беринг!