Нилуфар Усмонова “Арслоним” номли янги альбом тақдимотини ўтказди
Кетма-кет янгиликларни тақдим этишда ҳамкасбларидан анча илгарилаб олган хонанда Нилуфар Усмонова “Арслоним” деб номланган янги албом тақдимотини ўтказди. Журналистлар ва мухлислари даврасида бўлиб ўтган мазкур кичик тадбир аъло кайфиятда бўлиб ўтди десак муболаға бўлмайди.
Тақдимот ОАВ вакилларининг қизиқарли саволлари билан старт олди. Аввалига хонанда янги альбоми билан барчани таништирди.
-“Арслоним” номли бу альбомимиз 17 та қўшиқни ўз ичига олади. Унда бир нечта янги қўшиқлар билан бирга, мухлисларимизга манзур сўнгги тароналаримиз ҳам ўрин эгаллаган. Ўзбек тилидаги қўшиқларимиздан бошқа, рус, инглиз тилида ижро қўшиғим ҳам бор. Бу тақдимотни кичик даврада ўтказяпмиз. Катта тантана билан бўлиб ўтишини режалаштирган эдик. Бироқ, ҳозирги ҳолатимдан келиб чиққан ҳолда, кичикроқ қилиб одатдагидек ўтказишга қарор қилдик. Бироқ, кейинги альбомим ҳам тайёр. Уни албатта катта тантана билан тақдим қиламиз.” – дейди хонанда барчага берган маълумотига қўшимча қилиб.
Шунингдек, бир неча кун олдин оммага тақдим қилинган “Дадасини қизи” номли қўшиқ кейинги альбомга киритилганини ҳам алоҳида таъкидлаб ўтди.
Альбомда “Арслоним”, “Энг гуллаган ёшлик чоғимда”, “Человек”, “Кел иккимиз”, “Hot Night”, “Кел”, “Алла”, “Қол”. “Баҳор”, Ваъдалар”, “Туғилсам”, “Ёнимда”, “Ҳасрат”, “Қиз бола”, Келақол жоним”, “Чин севаман” номли қўшиқлар ўрин эгаллаган. Мазкур альбомни сиз “Discovery” диск дўконларидан ҳарид қилишингиз мумкин бўлади.
Шунингдек, тақдимот давомида хонанда куни кеча суратга олинган янги видеоклипини ҳақида ҳам тўхталиб ўтди. “Дадасини қизи” номли композиция учун яратилаётган видеоклипни тасвирга тушириш жараёни ва тўлиқ маълумотни кейинги янгиликларимизда тақдим қиламиз.
