"Қизларнинг жахли чиқди” фильмининг намойиши бўлиб ўтди
Куни кеча режиссер Илҳом Мухаммадиброҳимовнинг янги “Қизларнинг жаҳли чиқди” фильмининг намойиши бўлиб ўтди. Унда кино ижодкорлари, санъат вакиллари, ОАВ ходимлари ҳамда кино ихлосмандлари иштирок этишди.
Сценарий муаллифи Мадина Йулдошева ҳамда саҳналаштирувчи тасвирчи Бобур Йулдошевлар томонидан суратга олинган ушбу фильм аёлларнинг жахлини чиқарадиган, жиғига тегадиган ҳолатлардан келиб чиққан муаммолар ҳақида ҳикоя қилади. Воқеалар тажрибасиз психолог Қундузхоннинг тренинг жараёнларида авжига чиқади. Қатнашчилар оиланинг мустаҳкамлигига эрларни жазолаш билан эришишни афзал қўришади ва Қундузхон бошчилигида хужумга отланишади. Бир йил тайёргарлик қўрилган картинада актёрлардан Акбархўжа Расулов, Хабиб Ортиқов ва дебютант ижодкор Хусан Рашидов иштирок этишди. Актрисалардан эса Зарина Низомиддинова, Наргиза Салмонова, Феруза Собитова, Муқаддас Саъдуллаева, Баҳора Арслонова ва бошқаларни кўришингиз мумкин. Шунингдек, картинада янги юзлар ҳам экранга чиқди. Комедик жанрдаги бу фильм бир нечта ҳазил-мутойибага бой қисқа ҳикоялардан иборат. Мазкур кино асарни сиз 28-декабрдан бошлаб юртимиз кинотеатрларида томоша қилиш имконига эгасиз.
