Шаҳзода “Раҳмат ҳаёт” деб номланган альбом тақдимотини ўтказди
Куни кеча ўзининг етти кун давом этган ижодий концерт дастурини тақдим этган мафтункор Шаҳзода бугун “Раҳмат ҳаёт” деб номланган альбом тақдимотини ўтказди. 11 май соат 18:00 да Discovery дискдўконида хонанданинг ташриф буюришини мухлислари қувонч ва ҳис ҳаяжон билан кутиб туришди. Шаҳзоданинг чин маънодаги мухлислари, фанклуби аъзолари, яқин дўстлари ва оммавий ахборот воситалари ҳодимлари таклиф этилган мазкур тақдимот маросимига хонанда ҳар доимгидек яхши кайфиятда ва бетакрор кўринишда ташриф буюрди.
Тақдимотда хонанда бугунги кундаги ижодий янгиликлари, бўлиб ўтган концерт дастури ва келажакдаги мақсадлари ҳақида маълумотлар берди, берилган турли саволларга жавоблар йўллади. Бу ижодий учрашувдан нафақат Шахзоданинг ўзи балки унинг ижодига бефарқ бўлмаган, бугунги кечага ташриф буюрган меҳмонларнинг барчаси завқ олган бўлса ажабмас.
Шу қаторда ҳонанда доимий равишда уни қўллаб қувватлаб турадиган фан клуб аъзоларига алоҳида ўз миннатдорчилигини билдириб ўтди.
Ҳар доимги альбом тақдимоти маросимларидан фарқли равишда самимий суҳбат тарзида ўтган бу кеча Шаҳзоданинг мухлислари учун қувончли таассуротларга бой бўлди. Янги альбом тақдимоти билан севимли хонандамиз Шаҳзодани сайтимиз номидан чин дилдан қутлаймиз ва келгуси ижодига мувафақиятлар тилаб қоламиз.
