Дилмурод Султоновнинг яккахон концерт дастури бўлиб ўтди

Хоразмнинг яна бир истеъдодли хонандаси "Ниҳол" мукофоти совриндори Дилмурод Султонов 19, 20 февраль кунлари "Халқлар дўстлиги" санъат саройида "Лолам" номли янги концерт дастурини намойиш қилди. Мувоффаққиятли ўтган концертда томошабинлар мириқиб дам олишди. Кулишди, йиғлашди, рақсга тушишди. Концерт 3 қисмдан иборат бўлди. Дастур давомида 24 та қўшиқ ижро этилди. Дилмурод Султонов концертда бир нечта янги қўшиқларини ҳам армуғон қилди. Улар орасидан дуэт қўшиқ ҳам ўрин олган.  Қолаверса, Зоҳиршоҳ Жўраев  меҳмон санъаткор сифатида ташриф буюрди ва халқимизнинг севимли қўшиғи бўлган "Яхши кўриб қолдимда" номли ижод маҳсулини  куйлади. Ранг баранг йўналишдаги ва диллардан ўрин олиб улгурган тароналар учун махсус рақслар, саҳна асарлари тайёрланган бўлиб, рақсларни "Тумор" рақс ансамбли ва  Муборак Қодирова ижро қилди. Концертда ажойиб сўз устаси Аваз Оҳун ҳам иштирок этди. Ичакузди ҳангомалари билан мухлисларга аъло кайфият улашди. Хонанда Дилмурод Султоновни ва унинг ижодий жамоасини файзли концерт дастури билан табриклаймиз ва дастурда премьера қилинган янги қўшиқлар тақдимотини кутиб қоламиз.