Сардор Мамадалиев концертида кутилаётган янгиликлар билан бўлишди

Хушовоз хонанда Сардор Мамадалиев шу кунларда 6, 7, 8 апрель кунлари бўлиб ўтадиган “Йигит ноласи” номли яккахон концерт дастурига қизғин тайёргарлик кўрмоқда. Ушбу концертда мухлисларни қандай совғалар кутаётганини билиш мақсадида хонанда билан боғландик. Сардор Мамадалиев мамнуният ила кутилаётган туҳфалар, янгиликларни биз билан бўлишди. Ушбу концерт учун 14 та янги тарона яратилмоқда. Дастурдан янги тароналар билан бирга хонанда репертуаридаги сара қўшиқлар ҳам ижро этилади. Концерт давомида кўпгина мусиқий асарлар жонли ижрода куйланиши ҳам кўзда тутилган. Бу ҳали ҳаммаси эмас. Шу пайтгача дуэт куйламаган Сардор Мамадалиев, концерт режиссёри Саъдулла Абдуллаев томонидан киритилган таклифга биноан, 2 ёки 3 дона дуэт қўшиқ куйлаши мумкин. Қизиқ, у бу борада қандай қарорга келар экан. Таклифни қабул қиладими ёки йўқ? Буни албатта вақт кўрсатади. Ҳозирча кузатишда давом этамиз.