“Танҳо юлдуз ёҳуд Сени ўзим бой қиламан” юлдузли кинокартинасининг тайёргарлик ишлари авжида!
Ўзбек киносида янги фильмлар суратга олиниб, омма эьтиборига ҳавола этилаётгани ҳақида маълумотлар бериб бормоқдамиз. Бу кинокартиналар қайсидир жиҳати билан бир бирига яқиндек. Бироқ эндигина суратга олиш ишларига тайёргарлик жараёни бошлаб юборилган янги фильм бошқаларидан буткул фарқ қилади. “Ортиқча омад”, “Қалб кўзгуси”, “ 7 - ҳайкал”, “Жигарбандим” фильмларининг режиссёри Санжар Шодиев томонидан тасвирга олиш режалаштирилган янги “Танҳо юлдуз ёҳуд Сени ўзим бой қиламан” деб номланган юлдузли кинокартина барчани бирдек эътиборини ўзига тортиши турган гап.
Санжар Шодиев ҳар бир киносида ўзгача йўналиш, ўзгача шижоат ва кайфият билан ёндашиши барчага маълум. Тайёргарлик ишлари бошлаб юборилган мазкур фильмга ҳам ана шундай шижоат билан киришилган. Буни биргина фильм ғояси-ю ижодий жамоадан билиб олиш мумкин. Абдуваҳоб Ғаниев операторлигида суратга олинадиган бу фильмнинг сценарий муаллифи Зулҳумор Солиева. Фильмнинг асосий ғояси шоу-бизнес ҳаётини қамраб олган бўлиб, реал воқеаларга асосланган ва бадиий тўқималар билан сайқалланган.
Кинокартинада бир қатор машҳур актёр ва актрисалар, шунингдек таниқли хонандалар кутилмаган образларда намоён бўлиши кутилмоқда. Жумладан фильмда Абдували Ражабов, Равшан Собиров, Жавоҳир Зокиров, Адиз Ражабов, Шоҳида Исмоилова, Саида Раметова, Абдураим Абдуваҳобов, Саид Мухторов, Мирза Азизов, Санжар Шодиев, Алишер Отабоев, Зуҳра Солиева ва бошқа 30-40 нафар таниқли юлдузлар жалб этилган.
Картинада маҳоратли актёр Адиз Ражабов ҳозирча сир тутилаётган ижодкор билан фильм учун дуэт тарона куйлаши кутилмода. Фильмнинг тасвирга олиш ишларига тез кунда старт берилади ва янада батафсил маълумотлар билан бирга суратга олиш жараёнларидан ҳам баҳраманд бўласиз.
Шуни алоҳида маълум қиламизки, фильм учун йигит ва қизлар ўртасида кастинг эълон қилинган. Унда ёшидан қатъий назар барча кино оламига бефарқ бўлмаган қизиқувчилар иштирок этишлари мумкин. Кастингдан ўтган ҳар бир йигит – қизлар мазкур юлдузли кинокартинада кутилмаган образларни яратиш имкониятига эга бўладилар.
