Гули Асалхўжаевадан кутилган клип премьераси "Атиргулим"
Ёқимли овоз соҳибаси Гули Асалхўжаева яқиндагина ўзининг янги видеоклипини бизнинг сайтимиз орқали премьера тарзида мухлисларига тақдим этганди. Ёш ижодкор Мурод Манзур билан ҳамкорликда яратилган дуэт “Севги фариштаси” дея номланган бўлиб, унга ишланган клип кўпчиликнинг илиқ муносабатларига сабаб бўлди. Аммо, хонанда бу билан чекланиб қолаётгани йўқ, тиним билмай ижод қилмоқда.
Бунинг натижаси сифатида бугун Гули Асалхўжаевадан яна бир янги видеомаҳсулотни қарши олинг.
Бир неча ой аввал премьера этилган ва айни кунда радиотўлқинлар орқали жаранг сочиб, тингловчиларнинг севимли тароналари қаторидан жой олган “Атиргулим” номли композиция истеъдодли ижодкор Нодир Азимов сўзи ва мусиқаси билан яратилган, тарона учун Жасур Бадалбоев мусиқий сайқал берган.
Мазкур қўшиқ учун клипмейкерлар Ҳасан ва Ҳусан Отабоевлар томонидан видеоклип суратга олинган. Бугун айнан шу клипни биринчилардан бўлиб бизнинг сайтимиз орқали томоша қилиб, баҳраманд бўлишингиз мумкин.