Узоқ кутилган фильм премьераси яқин...
Бугунги кунда ўзбек картиналари сони ортиб бораётгани сабаб томошабин ҳам сифатли маҳсулотга интиқ. Яқинда тасвирга олинган ишчи номи "Фарҳод ва Ширин" бўлган картина айни вақтда кўпчиликнинг қизиқишига сабаб бўлгани сир эмас.
Кўпчилик бу фильмнинг қачон тақдим этилиши борасида кўплаб саволлар берилди. Ва ниҳоят... мухлислар кутган кунга яқин қолди. 20-февраль куни пойтахтимиз кинотеатрларида бу картинанинг узоқ кутилган премьераси ўтказилади.
Бош ролларни маҳоратли ва латофатли хонанда ҳамда актриса Лола Йўлдошева ва профессионал актёр Умид Искандаров талқин қилган "Бу телба муҳаббат ёхуд Фарҳод ва Ширин" номли картина аёл ва эркак ўртасидаги мураккаб муносабатлар ҳақида ҳикоя қилади. Муҳаббатнинг янгича талқини акс этган фильм кутилмаган бурилиш ва кескин воқеаларга бойлиги томошабинни ўзига тортиши кутилмоқда.
Айтиш керак, картинанинг сюжети бошқа фильмларни такрорламайди. Фильм нафақат Тошкент шаҳри ва вилояти, балки Самарқанд шаҳрида ҳам тасвирга олинган. Картина учун яратилган саундтрек эса шу вақтгача хит даражасигача кўтарила олди. Лола ижросидаги "Фарҳод ва Ширин" номли қўшиқ ва унга яратилган клип турли хит-парадларда етакчи ўринларни эгаллашга муваффақ бўлган.
Картина ижодкорлари 20-февраль куни барча кино шинавандаларини премьерага чорлаб қолишади!