Манзура биринчи имтиҳонини аъло даражада уддалади. Концерт тафсилотлари
Қишнинг аёзли кунларида ўз мухлислари ва ташриф буюрган барча томошабинлар учун баҳорий кайфиятни улаша олган хонанда Манзура бугун ўзининг илк яккаҳон концерт дастурининг биринчи кунини олқишлар билан ўтказди. Тасанно... Бу сўзни бемалол айта оламиз. Сабаби, биз уни бугун ҳақиқий маънода истеъдодли ижодкор сифатида яна бир бор кашф қилдик.
Минглаб томошабинни ўз бағрига чорлаган “Истиқлол” Санъат саройи бугун янада ёрқин нурларга ва файзга тўлди. Зарпардалар кўтарилиб саҳнада бугунги байрамнинг сабабчиси Манзура пайдо бўлганида ишончимиз комилки концертга ташриф буюрганлар бекор келмаганликларига амин бўлдилар. Чунки дастурнинг аввалидан томошабинни ўзига боғлаб турувчи файз бор эди.
Саҳна қизил атиргуллар билан безатилган бўлиб ҳар бир қўшиқ айтилганида маълум бир декорация деталлари ўзгариб турди. Иккинчи ва учинчи блокларда эса саҳна кўриниши умуман ҳеч ким кутмаган ҳолда намоён бўлди.
Манзура ўн саккиз йиллик ижод йўлида яратган, улар ичидан энг сараланганлари, барча хит бўлган тароналари қаторида янги композицияларини ҳам муҳлислари учун тақдим этди. Бунинг устига ҳар бир тарона учун саҳнадаги раққос ва раққосалар билан биргаликда профессионал тарзда ўзи ҳам ҳиром айлади.
Хонандага концерт дастурида яқиндан ёрдам берган ҳамда қўллаб кувватлаган дўсти, қолаверса бугунги дастурнинг ташкилотчиси ва бош режиссёри Даврон Кабулов, маҳоратли бошловчи Акмал Мирзо ва Жаҳонгир Позилжоновларнинг саҳна кўринишлари йиғилганларни кайфиятини янада кўтарилишига сабаб бўлди.
Концертнинг энг эсда қоларли нуқтаси эса фарзанднинг ота онасига айтган дил изҳори бўлди. Таҳминан бешинчи қўшиғини якунлаб залдаги барча чироқларни ёқишлигини истаган хонанданинг гапларидан аввалига ҳамма ҳайрон эди. Кейин эса самимий оҳанг билан отасига қараб болалик давридаги лаҳзаларни эслаган ҳонанданинг кўзларига ёш қалқиди. Шу муқаддас саҳнада бугун санъаткор бўлиб куйлаётгани, уни дунёга келтирган инсонлар сабаб эканлигини айтиб уларни табриклади. Бу гаплардан сўнг залда ўтирган меҳмонларнинг кўзига ёш ҳам келди.
Яна бир нарсани айтиб ўтиш жоиз Манзура ўзининг илк балоғат ёшидаги ижодий имтиҳонини ҳаяжонларга тўла аммо ҳақиқий маънода самимий аъло баҳоларга топшира олди. Биз унга яна қолган икки кун давомида куч қувват ва омад тилаймиз.
