Манзурадан янги клип премьераси: “Севги синови”
Эстрадамизда ўз йўналиши ва дилга яқин қўшиқлари билан кўплаб мухлисларнинг юрагидан жой олган Манзура бугун янги ижод намунасини тақдим этмоқда.
Яқиндагина “Ўзбегим Таронаси” радиоси орқали Манзуранинг “Севги синови” номли қўшиғи премьера қилинганди. Бугун эса ваъдага мувофиқ, мазкур таронага ишланган видеоклип эътиборингизга ҳавола этилади.
Клип сценарийси учун ҳаётий сюжет танлангани ва якуний ечим томошабин учун қизиқарли бўлиши аниқ. Наримон Султонходжаев томонидан тасвирга олинган клип сюжети бугунги кунда тез-тез учраб туришига кўпчилик гувоҳ бўлмоқда.
Айнан қандай сюжет эканлигини билишни истасангиз, албатта клипни томоша қилишингиз зарур бўлади. Муҳаббат ва нафрат ўртаси бир қадам эканлиги ёки ёлғон аралашган муҳаббат абадий эмаслиги кўрсатиб берилган.
Клипда Манзуранинг образини алоҳида таърифламасдан иложиси йўқ. Сабаби бундай кўринишда хонанда ҳали ҳеч қайси видеода намоён бўлмаган.
Ўзига хос яратилган образ Манзура учун махсус услуб сифатида ёдда қолиши шубҳасиз.
Хулоса қилиб айтганда, Манзуранинг “Севги синови” қўшиғига ишланган видеоклипи нафақат ёшлар, балки ёши катта мухлислар учун ҳам маъқул келиши аниқ.
