Достон Убайдуллаевдан янги видеоклип тез кунда!

Ўзининг иқтидори билан болалигиданоқ санъат олмига қадам қўйиб, халқимизнинг назарига тушган, ўзининг қулоққа хуш ёқувчи тароналари билан мухлислари қалбидан чуқур жой эгаллаган хонанда Достон Убайдуллаев аллақачон тингловчиларнинг севимли қўшиғига айланиб улгурган “Ёшлик” композициясига видеоклип суратга олдирди. Ушбу жараён борасидаги барча саволларимизга жавоб олиш учун хонандага юзландик.

Достон Убайдуллаев: Тўғриси айтсам, бу қўшиқ илк бор яккахон концерт дастуримда ижро этилган. Концертимда ўндан ортиқ янги тароналар куйланман ва навбати билан тайёр ижод маҳсулларимизни халқимизга тақдим этиб келмоқдамиз. Навбат “Ёшлик” қўшиғимизга етиб келди ва ҳозир клип олиш жараёнидамиз. Бу видеоклипнинг режиссёри Саъдулла Ҳикматов.

Клипмейкер билан ўтириб клип ғояси ҳақида ўйлаганимизда , умуман бошқача сценарий яратилган эди. Шу сценарий бўйича клипни 2 ой муқаддам тасвирга олиш ишларини бошлаган эдик. Икки кунга мўлжалланган жараённинг бир кунини суратга олиб бўлганимиздан сўнг, бир ўртоғимиз дўсти билан учраштирди. У инсон билан учрашганимда “Ёшлик” қўшиғингизни радио орқали эшитиб қолдим. Унда бошимдан ўтказган воқеалар акс этган. Мени ҳаётимни куйлабсиз. Агар ўша воқеаларини сизга сўзлаб берсам, шуни клип қила оласизми?” - деб сўради. Хуллас, бу  инсоннинг ҳаётидаги воқеа айнан мен хоҳлагандек бўлиб, клипимга жуда мос тушди. Шунинг учун бир кунлик иш жараёнидан воз кечдик ва шу дўстимиз айтган воқеа бўйича клипни суратга олишни режалаштирдик. Мана кўриб турганингиздек, тасвирга олиш ишларини бошлаб юбордик.”

Видеоклип жараёни жуда қизиқарли воқеаларга бой бўлди. Тез кунда бу видео асардан биринчи бўлиб албатта сайтимиз орқали томоша қилишингиз мумкин бўлади.

Эслатиб ўтамиз, “Ёшлик” қўшиғи мусиқаси ва сўзи Иқбол Муҳаммаджоновга, аранжировкаси Ботир Алиевга тегишли.