“Ёмғир остида...”: ишонч ва ишончсизлик ораси бир қадам...
Ўзбек кино мухлислари учун тез кунларда тақдим этилиши кутилаётган фильм муносиб туҳфа бўла олишига ишончимиз комил.
“Shayxоntоhur film” студияси ижодкорлари томонидан суратга олинган картина “Ёмғир остида...” дея номланиб, мелодрамма жанрида суратга олинган.
Асосий мавзуси ишонч бўлган картина сценарийси Аҳрор Зуфаров ва Анвар Исмоилов томонидан ёзилган. Фильм воқеалари бош қаҳрамон қизнинг ҳаёти, ўй-хаёллари ва ички кечинмаларидан ҳикоя қилади.
Шахсий ҳаётида рўй берган воқеа туфайли руҳий зарба олган қизнинг характери бевосита унинг ҳаётига таъсир қилади. Шу билан бирга қаҳрамон қиз ҳаётида ўзи каби руҳиятга эга киши пайдо бўлиши фильмнинг асосий кульминациясига айланади. Шундан сўнг воқеалар қандай тус олади? Буни фильм премьерасидан кейин билиб олишингиз мумкин.
Фильмда бош ролларни бугунги кунда кўплаб кинолар ва видеоклипларда ўз маҳорати билан мақтовларга сазовор бўлаётган ёш актриса Юлдуз Ражабова, Дониёр Ҳафизов, Лола Элтоева, Фатхулла Маъсудов, Нигора Каримбоева ижро этишган. Шунингдек, фильмда Тальат Юлдашев, Бибинур Муҳаммадиева, Бахтиёр Қосимовлар ижросига ҳам гувоҳ бўлишингиз мумкин.
Жаҳонгир Ибрагимов операторлиги остида тасвирга олинган фильмнинг режиссёри Қудратилла Дадажонов. “Ёмғир остида...” картинасининг премьераси 16-сентябрга белгиланган. Фильмнинг бош ахборот кўмакчиси сифатида сайтимиз жамоаси мазкур картина премьерасидан репортажни албатта эътиборингизга ҳавола этамиз.
