Манзура ва Бунёдбек Саидов дуэтига клип суратга олинди
Яқинда нафақат она юрти Хоразмда, балки Тошкентда ҳам етарлича мухлисларга эга бўлган Бунёдбек Саидов пойтахтимизда икки кунлик яккахон концерт дастурини тақдим этганди. Мазкур концерт давомида хонанда ижодидаги янги дуэтлардан бири илк марта жаранг сочган.
“Дастингдан” номли тарона эстрадамизнинг кўзга кўринган вакиласи Манзура билан бирга куйланган. Аслида бу дуэт яратилиши тарихи билан қизиққанимизда, қўшиқ ёзиш таклифи Бунёдбек Саидов томонидан билдирилгани маълум бўлди.
Манзура “Ўзбекнаво” эстрада бирлашмаси томонидан ўтказилаётган “Биз - буюк юрт фарзандларимиз” шиори остидаги ёшлар фестивалида иштирок этиш учун Хоразмга гастроль сафари уюштирган вақтида Бунёд Саидов хонанда билан боғланиб, дуэт ёзиш таклифини билдирган. Бу сафар якунлангач, Бунёдбек Саидов Тошкентга шахсан ўзи ташриф буюриб, Манзура билан аниқ келишувга эриша олган экан.
Бу борада маҳоратли Жасур Бадалбоев билан ҳамкорлик қилинган. Дуэт тарона ҳар иккала хонандага ҳам маъқул келиб, унга клип ҳам суратга олишни режалаштиришди.
Яқинда олиб борилган суратга олиш ишларидан олинган эксклюзив фотосуратларни эътиборингизга ҳавола этамиз.
Санжар Маткаримов режиссёрлигида ва Жаҳонгир Ибрагимов операторлигида тасвирга олинган видео учун павильонда махсус ўзига хос декорация яратилди. Ҳар иккала ижодкорнинг кўринишлари ҳам клипга монанд сирли ва ўзгача.
Тез кунларда янги дуэт тарона ва унга ишланган видеоклипни сайтимиз орқали қарши оласиз.
