Энг гўзал ва энг дилга яқин қўшиқлар Ватан ҳақидадир
Юртимизни қанча кўкларга кўтарсак, қанчалар мадҳ этсак шунча оздек туюлаверади. Ватан муқаддасдир ва у қалбимизнинг бир бўлаги.
Она Ватанимиз ҳақида энг сара қўшиқлар яратиш ва уларни тингловчилар эътиборига ҳавола этиш истагидаги ёш истеъдодлар барча тароналарини юрак-юракдан ижро этмоқдалар.
“Ягонасан, муқаддас Ватан!” Республика кўрик-танлови Муҳтарам Президентимизнинг ташаббуси билан 2009-йилдан буён ўтказилиб келинаётган бўлиб, жуда кўп истеъдодли хонандалар ижодининг танилишига ва мухлислар қалбидан жой олишига хизмат қилмоқда. Шу кунларда мазкур танловнинг “Ўзбекнаво” эстрада бирлашмаси тизими бўйича саралаш босқичлари кенг аҳоли орасида кўтаринки кайфиятда ўтказилмоқда.
“Ўзбекнаво” эстрада бирлашмасининг Бухоро вилоят бўлими томонидан мазкур танловнинг саралаш босқичи бўлиб ўтди. Танловда профессионал ва ҳаваскор хонандалар иштирок этдилар.
Танловда айниқса, бухоролик ёш эстрада хонандалари дуэти “Диёр” гуруҳининг чиқиши меҳмонлар томонидан олқишлар билан кутиб олинди.
Танловда совринли ўринларни эгаллаган ва фаол иштирокчиларга диплом, фахрий ёрлиқлар топширилиб, улар Республика босқичига йўлланма олдилар.
