Нилуфар Усмонова янги видеоклип суратга олдирди

Халқимизнинг севимли хонандаси Нилуфар Усмонова мухлисларини қувонтиришни давом этади. Хонанда яқиндагина "Мен кимман айт" таронаси билан халқимизга ўзгача кайфият ва завқ улашган эди. Орадан кўп ўтмай яна бир янги лойиҳа устида иш бошлади. Бу лойиҳа унинг тез кунларда томошабинларга тақдим этилажак видеоклипидир. Клип "Аламларим" номли композиция учун тасвирга олинди.
Авваламбор қўшиқ ҳақида тўхталадиган бўлсак, ушбу мусиқий асар бундан 3 йил олдин, Сарвар ва Комил билан ҳамкорликда ёзилган. Видеоклип эса Нилуфар Усмонованинг доимий ҳамкори Сарвар Исаев режиссёрлигида суратга олинди. Тасвирчи Рустам Муродов. Клип трек услубида яратилаётган бўлишига қарамай, унда бош рол ижрочилари ҳам бор. Клипда бош қаҳрамон образида ёш истеъдод эгаси Муҳаммадали ни кўришингиз мумкин. Бу ижодкор асли бодибилдинг спорт тури билан шуғулланиб келади. Шу соҳа орқали уни кўпчилик танийди. Эндиликда эса уни санъат соҳасида ҳам кўришингиз мумкин. Нилуфар Усмонованинг клипида Муҳаммадали илк ролини ижро қилди. Ўйлаймизки, унинг маҳоратига клип премьерасидан сўнг баҳо берасиз.
Нилуфар Усмонова бу клипда 3 хил образда намоён бўлади. Либослар бўйича дизайнер ва стилист Бегзод Саидов. Грим устаси, визажист Рената Искандарова.