"Хоҳламайман” - навбатдаги харҳашанинг қаҳрамони ким Ойбекми ёки Нигора?
Сарлавҳани ўқиб ҳайрон бўлгандирсиз. Аслида ким нимани хоҳламаяпти Ойбекми ёки Нигорами? Бу саволга жавобни тез кунда тақдим этиладиган янги қўшиқ ва клип орқали билиб оламиз.
Ойбек ва Нигора айни дамда “Хоҳламайман” номли янги тароналарига видеоклип ишлаш билан банд. Хонандаларнинг продюсери Зиёдилла Шамсиддиновнинг берган маълумотларига қараганда, қўшиқ шўх ва рақсбоп.
Клип ҳам таронага монанд комедик йўналишда суратга олинмоқда. Унда бош роллардан бирини ажойиб актриса Севара Солиева ижро қилган. Клипда кутилмаган сюжет акс этиши шубҳасиз. Буни тақдим этилган фотосуратларга қараб ҳам англаш мумкин. Клипни тасвирга олиш жараёнлари ҳам қизиқарли ўтмоқда. Демак, яқин кунларда севимли ижодкорларинги здан навбатдаги ижод маҳсулини кутиб қолинг.
