Фаррух Раимов илк альбом тақдимотини ўтказди
Ёш ва умидли хонанда Фаррух Раимов ҳам бугун ўзининг илк альбом тақдимотини ўтказди. Мазкур тадбир пойтахтимизда жойлашган сўлим гўшалардан бирида ҳамкасблари ва яқинлари даврасида бўлиб ўтди.
Тақдимот бошида хонанда барча устозлари, ҳамкасблари ва альбом яратилишида меҳнати синган шоирлар, бастакорларга ўз миннатдорчилигини билдирди:
-Бугун мен ўзимни илк альбомимини тақдим этар эканман, уни шунчаки чиқаришни ва тақдим этишни истамадим. Қолаверса, куни кеча наврўз айёмида қатнашиб, илк бор катта саҳнада қўшиқ куйладим. Шу кунларга шукур айтиб, бу кечани шукроналик кечаси сифатида сизлар билан бирга ўтказишга қарор қилдим. Мен бу альбомни яратилишида яқиндан ёрдам берган барча шоирлар ва бастакорларга ва устозларимга катта миннатдорчилик билдираман. Ҳар доим мени ва мени ижодимни қўллаб-қувватлаганингиз учун катта раҳмат.
Ўз дил изҳорларидан сўнг шу альбомдан жой олган энг сара қўшиқларидан бир нечтасини ижро этиб берди. Даврани эса лобар хонандаларимиз ўз рақслари билан янада тўлдиришди.
Фаррух Раимов томонидан яратилган “Кўнгил боғим” номли мазкур альбом 18 та қўшиқ ва 8 та клипни ўз ичига олган. Ўйлаймизки, ушбу альбом барча мухлисларга манзур келади.
