Йилнинг илк видеоклипи тасвирга олинди
Ўзбекистонда хизмат кўрсатган артист Сардор Раҳимхон 2015-йилда тиним билмай ижод қилиб, бир қатор хит тароналарни кетма-кет тақдим этди. Янги йилни ҳам ўзгача шижоат билан бошлаган хонанда йилнинг илк видеоклипини тасвирга олдирди. “Омон-омон” композицияси ва унга ишланган видеоклип халқимиз учун муносиб туҳфа бўлиши аниқ.
Сардор Раҳимхоннинг сўзларига қараганда, бу қўшиқ икки йил давомида яратилган. “Бу қўшиғим севгилисидан 25 йил йироқда яшаган, лекин бир-бирига содиқ қолган икки севишган, хозирда бири 75да, иккинчи эса 70 ёшни қаршилаган бахтли инсонларга бағишланади.” - дейди Сардор Раҳимхон сайтимизга берган маълумотларига қўшимча қилиб.
Бу мусиқий асарни тинглаган тингловчи унга асир бўлиб, қаттиқ таъсирланади. Бундан уларнинг кўзига ёш тўлса ажаб эмас. Мазкур композиция Зоҳиджон Обидов сўзи, Жасур Жавҳаназаров мусиқаси ва аранжировкаси билан ёзилган. Мусиқий асарга клипмейкер Дилмурод Агзамов режиссёрлигида видеоклип суратга олинди. Оператор Иззат Лутфуллаев. Демак, севимли санъаткорингиздан 25 йиллик севги қиссаси тез кунда кутиб қолинг.
