Руспублика онкология илмий марказининг болалар бўлимида “1 июнь - Бутунжаҳон болаларни ҳимоя қилиш куни”га бағишланган хайрия тадбири
Бугун Республикамизнинг турли гўшаларида болаларга аталган шодиёналар бир-бирига уланиб кетди.Шу қаторда Тошкент шаҳрида жойлашган Руспублика онкология илмий марказининг болалар бўлимида “1 июнь - Бутунжаҳон болаларни ҳимоя қилиш куни”га бағишланган хайрия тадбири бўлиб ўтди. Ҳар кун кимётерапия, нур каби муолажаларни қабул қилиб, узоқ вақт давомида касаллик билан курашаётган кичкинтойлар чеҳрасида табассум кўриш барчани чексиз бахтга ошно этади.
Мазкур тадбир чиндан ҳам болаларга, уларнинг ота-оналарига, тиббиёт ходимларига шодлик ҳадя қилди. Болаларга севинч улашган юлдузлар - “Радио” гуруҳи, Каниза, Ирода Дилроз, Ирода Иралиева, Музаффар Мирзараҳимов, Самандар, Сардор Раҳимхондир. Таниқли хонандалар ширинтойларни рақс майдонига чорлаб, ўзлари ҳам болалар каби рақсга тушдилар.
Ўз қўшиқлари, меҳрлари билан бироз бўлса-да хасталик унут бўлишига қўлдан келганча ҳаракат қилганлари эътирофга лойиқдир. Кичкинтойлар ота-оналари, шифохона ходимлари билан биргаликдаги ўйин-кулгу, хурсандчиликлари бир неча соат давом этди.
Шифохонадаги ушбу завқу шавққа тўла муҳит бемор болалар қалбидаги куч-қувватни, ишончни, қувончни оширишига умидимиз катта. Бутун дунё болаларининг шўх кулгулари ҳамиша баралла жаранг сочишига тилакдошмиз.
