Саидадан узоқ кутилган қўшиқ премьераси "Тирнама"
Айни кунларда радиотўлқинлар орқали янграб, тингловчилар кўнглидан жой олиб улгурган “Дунё” номли таронани қайси санъаткор ижро этган, деган савол кўпчиликни қизиқтириб қўйди. Мазкур қўшиқ ижрочиси, “Аъло” гуруҳининг собиқ хонандаси Саида яккахон ижодини бошлагач, ўз истеъдодини тўлиқ намоён этишга янада имкон пайдо бўлди.
Бугун яна бир янги ижод маҳсулини кенг оммага тақдим этган хонанда “Ўзбегим таронаси” радиоси меҳмони бўлди. Самимий ижодий суҳбатдан сўнг янги “Тирнама” номли композиция эфирга узатилди. Мазкур тарона радиомухлислар томонидан илиқ кутиб олинганини эса улардан бўлган телефон қўнғироқларидан билишимиз мумкин.
Айтиб ўтишимиз лозим, “Тирнама” номли янги композициянинг сўзи ва мусиқаси Феруз Абдуллаевга тегишли бўлиб, аранжировка ишларини Жасур Бадалбоев амалга оширган.
Мазкур тарона учун Темур Пиримқулов томонидан ажойиб видеоклип суратга олинган бўлиб, клип учун махсус либослар устида Лидия Андре ишлаган. Тез кунда биринчилардан бўлиб мазкур қўшиқга ишланган видеомаҳсулотни томоша қиласиз. Ўтказиб юборманг.