“Дард” - чин инсоний фазилатлар мужассам фильм премьераси

Куни кеча пойтахтимиздаги Киночилар уйи ва Алишер Навоий номидаги кино саройларида ўзбек киносида яратилган янги “Дард” номли фильмнинг премьераси ўтказилди. 

Картина премьерасидан аввал ёш хонандалар ижросидаги қўшиқлар кинозалга ташриф буюрган меҳмонларнинг кайфиятини кўтаришга хизмат қилди. Фильм ижодкорлари саҳнага таклиф этилгач, олқишлар тинмади. 

Аҳрор Нурмуҳаммадов сценарийси асосида суратга олинган мазкур фильм маиший мавзуда бўлиб, ҳаётда учрайдиган воқеа асосида тасвирга олинган. Фильм қаҳрамонининг қисқа вақт ичида кечирган кечинмалари ва турли вазиятларга дуч келишига қарамасдан мардонавор қарорлари томошабинни ўзига жалб этади.

Фильмнинг постановкачи режиссёри Дилмурод Қамбаров. Ота-онадан эрта айрилган ака-сингил қисмати кўплаб томошабинлар юрагини ларзага келтириши шубҳасиз. Картина якуни эса томошабинларнинг олқишига сазовор бўлди. 

Фильмда актёрлар жамоаси бир қатор маҳоратли ижодкорлардан ташкил топган. Шу сабаб ҳам ҳар бир образ ишонарли тасвирланган. 

Картинада бош ролларни Шавкат Комилов, Жамила Ғофурова ва Ёрқиной Ғозиева ижро этишган. Бундан ташқари, фильмда Ҳамид Тошпўлатов, Дилором Мирзаева ҳам иштирок этишган. 

Фильм учун Дилдора Ниёзова "Кечиргин Аллоҳ" дея номланган саундтрек куйлаган. Кинонинг ўзи эса 2013-йилда 5-6 ой мобайнида суратга олинди.