Баҳром Назаровнинг гастроль концертлари олдидан матбуот анжумани ва туҳфа сифатида "Кечикиш" видеоклипи тақдимоти
Истеъдодли хонанда Баҳром Назаровнинг бир нечта қўшиқлари хит даражасига кўтарилиб, оз фурсатда эл назарига тушди. Бугун унинг ижодида муҳим кунлардан бири, яъни юртимиз бўйлаб ўтказиладиган гастроль концертлари олдидан матбуот анжумани бўлиб ўтди. Пойтахтимиздаги “Grand Orzu” меҳмонхонасида ўтказилган мазкур анжуманда теле -радио, газета ва шоу-бизнес сайтлари ҳодимлари ташриф буюришди. Кутилаётган гастроль сафарлари ва хонанданинг ижоди билан боғлиқ саволлар билан мурожаат этишди.
“Мўъжиза медиа” компанияси томонидан юқори даражада ташкил этилган матбуот анжуманини радиобошловчи Акмал Мирзо олиб борди ва журналистлар билан савол-жавоблар самимий ижодий суҳбат тарзида бўлиб ўтди. Хонанданинг 28 апрелдан старт олиб, 27 июнга қадар давом этадиган концерт дастурлари, юртимизнинг деярли барча вилоятларида ўтиши режалаштирилган. Бу эса Баҳром Назаровнинг “Истиқлол” санъат саройида бўлиб ўтадиган яккахон концерт дастури олдидан бўлиб ўтадиган турне ҳисобланади.
Матбуот анжуманида Баҳром Назаровнинг “Кечикиш” номли қўшиғига суратга олинган видеоклип тақдимоти ҳам бўлиб ўтди. Сўзлари Маҳтумқули қаламига мансуб бўлган мазкур таронанинг мусиқасини марҳум санъаткор Муҳриддин Ҳолиқов яратган. Кўпчиликнинг қалбидан жой олган таронани қайта ижро этган Баҳром Назаров мазкур қўшиқ ва видеоклип мухлисларига манзур бўлишига ишонади. Видеоклип суратга олиш ишларида Баҳтиёр Турғунов режиссёрлик вазифасини бажарган ва унда актёрлардан Ҳамид Тошпўлатов, Зуҳра Ашурова, Хосият Ҳусанова, Феруза Норматовалар иштирок этишган. Баҳром Назаровнинг ўзи эса бош ролни ижро этган. Бугун сайтимиз орқали мазкур видеоклипни томоша қилиб, баҳраманд бўлишингиз мумкин.
Айтиб ўтганимиздек, журналистлар билан бўлган ижодий анжуманда хонандага берилган саволлар учун тўлиқ жавоблар йўллаб, самимий суҳбатда бўлган хонанда Баҳром Назаров йиғилганларни кўпгина ижодий янгиликлардан бохабар этди. Ижодкорнинг олдинда кутилаётган вилоятлар бўйлаб концерт дастурлари муваффақиятли ўтишига тилакдошмиз.
Фотолар муаллифи Тимур Кабуловга ўз миннатдорчилигимизни билдирамиз