“Пайшанбадан пайшанбагача 2” узоқ кутилган кинокомедия премьераси яқин

Ўзининг иқтидори ва меҳнати билан халқимиз назарига тушган серқирра ижодкор, истеъдодли режиссёр ва комик актёр Жавлон Шодмоновнинг комедия жанрида суратга олинган “Пайшанбадан пайшанбагача 2” деб номланган янги картинасининг премьера куни маълум бўлди.

25-август куни пойтахтимизда жойлашган Алишер Навоий номидаги киносаройида, “Киночилар уйи”, “Ғунча” кинотеатри ҳамда “Mega cinema” кинотеатрларида ушбу кинокартинанинг намойиши бўлиб ўтади. 26-августдан юртимиз кинотеатрларига ташриф буюриб, томоша қилиш имкониятига эгасиз.

Эслатиб ўтамиз, бу фильм аллақачон томошабинлар қалбидан жой олган “Пайшанбадан пайшанбагача” кино асарининг давоми ҳисобланади. Бош ролларни барчамизнинг севимли актёрларимиз Муҳаммадисо Абдулхайиров, Фарҳод Абдуллаев ва Шукрулло Исроиловлар ижро этишган. Бундан ташқари, картинада Гулчеҳра Носирова, Ҳосият Ҳусанова, Муяссар Бердиқуловаларни ҳам кўришингиз мумкин.

Сценарий муаллифлари Қобил Самигов, Жавлон Шодмонов ва Жасур Шодмонов. Оператор Нусрат Ҳусанов, пардозчи ва рассом Азиза Ҳусанова. Илк намойишидаёқ кино ихлосмандлари орасида катта қизиқиш уйғотган “Пайшанбадан пайшанбагача” киносининг давоми яъни “Пайшанбадан пайшанбагача 2” мухлисларни қай даражада ўзига жалб қилар экан? Биринчиси каби узоқ вақт энг талабгор фильмлар қаторидан ўрин эгаллармикан. Буни албатта картинанинг тақдимотидан сўнг билиб оламиз.