Жасур Умировнинг альбом тақдимоти бўлиб ўтди
Эстрадамизнинг яна бир истеъдодли хонандаси Жасур Умиров бугун ўзининг навбатдаги альбом тақдимотини ўтказди. Биттада иккита альбомини мухлисларига совға қилган хонанданинг мазкур тақдимотида ОАВ вакиллари, хонанданинг дўстлари ва мухлислари иштирок этишди. Тадбир бошида Жасур Умиров мухлисларни қизиқтирган саволларга жавоб берди. Шунингдек, ижодидаги сўнгги янгиликлар билан бўлишди.
Альбомлар ҳақида тўхталадиган бўлсак, биринчи альбом унинг 2016 йилда бўлиб ўтган концерт дастурининг дискидир. Эндиликда хонанданинг концертга ташриф буюра олмаган мухлислари бу дискларни харид қилиб, ўз уйларида томоша қилишлари мумкин бўлади. Иккинчи альбом эса “Вай-вай” деб номланган мусиқий тўплам бўлиб, унда хонанданинг хит тароналари жамланган. Жасур Умировнинг 22 та қўшиғи ва бонус тариқасида тақдим этилган энг сара тароналарини мазкур тўпламдан топиш ва тинглаш имконига эгасиз.
Ушбу альбомларни юртимизда жойлашган “Discovery” дўконларидан ҳарид қилишингиз мумкин. Тақдимотга ташриф буюрган мухлислар эса аллақачон бу тўпламларни қўлга киритишди.
