Латофатли Лоланинг янги видеоклипини суратга олиш жараёнидан батафсил маълумот ва фоторепортаж

Куни кеча эстрадамизнинг латофатли хонандаси Лола барчанинг севимли қўшиғига айланган “Соғиндим” таронаси учун видеоклип суратга олиш ишларини бошлаб юборганлиги тўғрисида маълум қилган эдик. Бугун мазкур жараённинг иккинчи куни ўз ниҳоясига етди.

“Соғиндим” видеоклипи ўзгача ва кутилмаган сюжетни ўз ичига олган бўлиб, бугун унда бош ролларни ижро этган қаҳрамонларни маълум қилсак бўлади. Демак, ушбу клипда бош ролларда Лола ҳамда Йигитали Мамажонов ижро этмоқда. Маълумки, Йигитали бундан олдин ҳам Лола билан ҳамкорликда ишлаган эди. У суратга тушган таронанинг клипи ҳозирги кунгача мухлисларини йўқотгани йўқ. 

Навбатдаги суратга олинаётган клипнинг жараёни ҳам ўта қизғин ва юқори кайфиятда бўлиб ўтганини инобатга олсак, у барчага манзур келиши шубҳасиз.

Мазкур видеоклипни суратга олиш учун жалб этилган ижодий гуруҳ ҳақида яна бир бор эслатиб ўтамиз, режиссёр Санжар Маткаримов, унинг ёрдамчиси Ихтиёр Бахтиёров. Иккинчи режиссёр Мансур Васати, оператор Рустам Муродов. Пардозчи Рената Искандарова, Либослар бўйича рассом Ҳилола Шер, визажист Диана Якушева. Картина директори Баҳриддин Шамсиддинов. 

Демак, латофатли Лоладан тез кунда яна бир янги клипни кутиб қолинг. Ҳозирча фотосуратларни томоша қилинг ва бизни кузатишда давом этинг.