«Биз гиёҳвандликка қаршимиз» шиори остида ўтказилган футбол шоудан батафсил!
Куни кеча пойтахтимизда жойлашган Пахтакор стадионида 26- июнь халқаро гиёҳвандликка қарши курашиш куни муносабати билан «Камолот» ёшлар ижтимоий ҳаракати бошчилигида, Маданият ва спорт ишлари вазирлиги, «Ўзбекнаво» Эстрада бирлашмаси, «Ўзбеккино» миллий агентлиги, «Ўзбектеатр» ижодий ишлаб чиқариш бирлашмаси томонидан «Биз гиёҳвандликка қаршимиз» шиори остида юлдузлар иштирокидаги футбол шоу бўлиб ўтди.
Мазкур футбол шоуда санъатимизнинг ёрқин намоёндалари иштирок этишди. Дастур шўх куй қўшиқлар остида бошланди. Унда Муниса Ризаева, Улуғбек Раҳматуллаев, Сардор Раҳимхон, Равшан Намозов, Манзура, Алишер Файз, Уммон гуруҳи, Шоҳруҳҳон каби хонандалар кабриолет русумидаги машиналарда стадионга чиқиб келишди ва ўзларининг дилтортар тароналари билан иштирокчиларни қутлашди. Ана ундан кейин барча ёшлар интиқиб кутган футбол-шоу бошланди.
Бирин-кетин яшил майдонга актёрлар ва хонандалар жамоаси ташриф буюришди. Футболчиларнинг кайфиятлари аъло даража эди. Актёрлар жамоаси мураббийи Дилшодбек Каттабеков, хонандалар жамоасида эса Равшан Намозов раҳбарлик қилди. Бош ҳакам Ҳабибулла Нозимов бўлди. Футбол-шоуни нуфузли шарҳловчи Тўхтамирза Холмирзаев ҳамда санъаткор Музаффар Мирзабеков кўтаринки руҳ ва кайфиятда олиб боришди. Терма жамоалар яъни актёрлар ва хонандалар жамоаси ўзаро майдонга тушдилар.
Актёрлар жамоаси аъзолари Жавлон Шодмонов, Аброр Ҳайитназаров, Толибжон Мўминов, Шукрулло Исроилов, Наримон Султонхўжаев, Азиз Раметов, Меҳриддин Рахматов, Валижон Шамсиев, Самандар Ҳамроқулов, Йигитали, Шерзодбек Саидалиев, Собиржон Отажонов (дарвозабон) ва бошқалардан иборат бўлди.
Хонандалар гуруҳи аъзолари эса Дилниёз Ғаффоров, Адҳам Солиев, Мустафо, Музаффар, Жамшид, Равшан Собиров, Бахром Назаров, Сардор Рахимхон, Шохруххон, Достон Убайдуллаев, Машҳурбек, Элдидо, Достон, Алишер ва бошқалар.
Миллий ўйинимиз «Арқон тортиш» мусобақаси орқали тўпни ўйинга актёрлар жамоаси киритиши маълум бўлди. Биринчи таймдан сўнг, хонандалар 2: 0 ҳисобида олдинга ўтиб олишди. Шундан сўнг Гиёҳванликка қарши курашиш мавзусига бағишланган видеоролик намойиш этилди.
Иккинчи таймда ҳам қизғин ўйин бўлиб ўтди. Бунда натижа дурранг билан якунланди. Пенальтийлар сериясида эса хонандалар ғолибликни қўлга киритишди. Ўйин сўнгида ғолиб жамоага «Камолот» олтин медали топширилди.
Қизғин, муросасиз, ҳажвий чиқишлар билан бой бўлган ўйинда барча иштирок этувчиларнинг ҳам, томошабинларнинг ҳам кайфияти юқори даражада бўлди. Албатта, бу профессионал ўйин эмас, балки ёшларни бир майдонга бирлаштириб, гиёҳвандликнинг ёмон иллат эканлиги, бу борада барча ёшлар бирлашишлари лозимлигини таъдикловчи тадбир. «Биз гиёҳвандликка қаршимиз» шиори остида ўтказилган мазкур "Футбол шоу" барча ёшларда катта таассуротлар қолдирганига ишонамиз.
Фотограф Тимур Кабуловга ўз миннатдорчилигимизни билдирамиз