Нилуфар Туркияда ҳам мухлислар орттирди

Яқиндагина янги дуэт таронаси учун яратилган видеоклипи сайтимиз орқали премьера килинган ширали овоз соҳибаси Нилуфар Туркиянинг Истанбул шаҳрида ўзининг концерт дастурини тақдим этди. 

Икки кунлик концерт дастури Истанбулдаги ''Kartal Bulent Ecevent'' ҳамда ''Bakirkuy Cem Karaca'' маданият марказларида бўлиб ўтди. 

Ўзбек санъатига ошуфта қалбларни чорлаган концертда нафақат юртдошларимиз ўзбекларни, балки турли миллат вакилларини кўриш қувонарли эди.

 Дастур уч блокдан иборат бўлиб, Нилуфар яккахон ижодидаги барча қўшиқларни ижро этди.

Бундан ташқари, концертнинг энг ёдда қоларли жиҳатлари Dj Piligrim билан ижро этилган ''Дилим'' қўшиғининг видеоклипи томошабинларга намойиш этилгани бўлди. 

Айтиб ўтишимиз лозимки, Нилуфарнинг ҳар бир блок учун алоҳида тайёрлаган либослари томошабинларда катта таассурот колдирди.

Яна бир эътиборли томони шундаки, Нилуфар репертуаридаги қўшиқлар мусиқаси профессионал турк созандалари томонидан жонли равишда ижро этилди.

Муваффақиятли ўтган концерт билан Нилуфарни қутлаймиз ва мухлислари сони кўпайиб, қўшиқлари дунё бўйлаб таралсин, деб тилак билдирамиз.