Ўзбекистонда илк мега-премьера: “Геолог. Ўлимдан кучли” блокбастерининг илк намойиши

Шов-шувли фильмнинг премьераси ҳам шов-шувларга сабаб бўлди. 

Халқаро стандартдаги картинанинг премьераси халқаро миқёсдаги фестиваллар каби юқори савияда ташкил этилди. “Самарқанд дарвоза” савдо мажмуасининг 2-қаватида гала премьера ташкил этилган бўлса, юзлаб кино шинавандалари бу жараённи бевосита шу қаватда ўрнатилган экран орқали 3- ва 4-қаватдан кузатиш имкониятига эга бўлишди. Яна бир энг муҳим жиҳати шундаки, савдо мажмуаси кириш қисми олдига ҳам катта экран жойлаштирилиб, бу ерга ташриф буюрганлар ичкаридаги премьера жараёнини бевосита онлайн равишда экран орқали томоша қилишди. Айтиш керак, шу вақтгача Ўзбекистонда картиналар бу савияда ташкил этилмаганди.

  

 

 

“Геолог. Ўлимдан кучли” фильми “Биринчи” сўзи билан кўп жиҳатдан боғлиқ. Сабаби бу картина Ўзбекистондаги илк блокбастер фильмдир. Шунингдек, бу лойиҳа юртимиздаги илк продюсерлик лойиҳаси. Алоҳида айтиш керак, картина бир вақтнинг ўзида кўп турдаги жанрларни ўз ичига олган.

 

  

Бу фильмни ўзбек кино соҳасини янги босқичга элтувчи картина дейиш мумкин. Ноодатий мавзу, ноодатий жанр, ноодатий тасвирлар, бироқ буларнинг барчаси реал ҳаётий воқеалар асосида суратга олинган. Ана шу жиҳат билан ҳам томошабин диққатини жалб эта олади. 

Махсус қизил йўлакча шоу-бизнесимизнинг энг кўзга кўринган вакиллари, картина ижодкорларини қарши олди. Премьерада Даврон Қобулов ва Нилуфар Сотиболдиева бошловчилик вазифасини бажаришди. Улар бирин-кетин юлдузларимизни қизил гилам узра чорлаб, барчаси билан қисқагина суҳбат уюштиришди. Даврон Қобуловнинг хазиллари кечана янада қувноқ кайфият бағишлади.

 

Кечанинг энг асосий меҳмони, яъни картина воқеалрининг бош қаҳрамони – Абдужамил Содиқов бўлди. У таклиф этилганида барча олқишлар билан кутиб олди. Айни вақтда 70 ёшни қаршилаган Абдужалил Йўлдошевнинг кечинмалари “Геолог. Ўлимдан кучли” картинаси яратилишининг асоси бўлиб хизмат қилди.

 

Кечанинг машҳур меҳмонлари қарши олингач, саҳнага ўзбек эстрадасининг машҳур юлдузларидан Нилуфар Усмонова ва Лола ўз қўшиқлари Билан барчага яхши кайфият бағишлаб, маросимга файз киритишди. Премьерада Шаҳзода қўшиқ куйламаслиги мумкин эмас эди. Сабаби айнан Шаҳзода ижросидаги “Мало ли” таронаси “Геолог. Ўлимдан кучли” фильми учун асосий расмий саундтрек сифатида танланган. Қўшиқ янграй бошлаши биланоқ меҳмонларнинг ҳаяжонлари янада ошди. Шундан сўнг, барча меҳмонлар “Самарқанд дарвоза” мажмуасининг 4-қаватида жойлашган кинотеатрга таклиф қилинди.

 

Картина намойиши олқишлар билан бошланиб, якун ҳам шу тарзда “Баракалла” деган таърифлар билан якунланди.

 

Блокбастер ҳақида тўхталадиган бўлсак, энг аҳамиятли жиҳати картина намойиши вақтида томошабин бир дақиқага бўлса-да чалғишга имкон топмайди. Чунки ҳар бир тасвир кутилмаган бурилишларни юзага келтириб, қизиқишни янада орттиради. Икки нафар талабанинг амалиёт даври ҳақиқий кутилмаган саргузаштга айланади. Буни томоша қилиш эса янада ёқимли. Шундай экан, бу картинани томоша қилишни тавсия этамиз.