Шоу бизнесимизнинг ёрқин намоёндаси Муниса Ризаева ўзининг альбом тақдимотини ўтказди
Эстрадамизнинг энг ёрқин юлдузи, минглаб мухлисларнинг севимли хонандаси Муниса Ризаева бугун ўзининг янги аудиоальбоми ҳамда илк яккаҳон концерт дастури видеодиски тақдимотини ўтказди. Мунисанинг чин маънодаги мухлислари, фанклуби аъзолари, яқин дўстлари ва оммавий ахборот воситалари ҳодимлари таклиф этилган мазкур тақдимот маросимида Муниса ижодий янгиликлари, янги альбомдан жой олган тароналари ҳақида маълумотлар бериб, фанклубнинг фаол иштрокчилари ҳамда журналистлар томонидан йўлланган турли саволларга жавоблар берди.
Келгуси ижодида яна қайси санъаткор билан дуэт куйлаш истаги борлиги ҳақида сўрашганида Муниса, бундай кетишда дуэт қўшиқлар яратиш борасида рекорд ўрнатаман шекилли, дея жавоб берганида, меҳмонлар юзига самимий табассум югурди. Ҳазил аралаш жавобдан сўнг хонанда тўлиқ маълумот ўрнида, бу йил иккита катта лойиҳага кўл уриши, булардан бири чет эллик таниқли юлдуз билан, кейингиси ўзбек шоу-бизнесининг энг кўзга кўринган вакили билан ҳамкорликдаги дуэт бўлишини маълум қилди.
Яна кинофильмларда роль ижро этиш истагингиз борми, деган саволга, ҳозирча йўқ, лекин яхши киносценарий таклиф этишса ўйлаб кўришим мумкин, саёз фильмларда суратга тушишни истамайман, деди. Мухлислари томонидан берилган, севгига ишонасизми, ўзингиз бу туйғуни ҳис этганмисиз, деган саволга, мен севганман, ҳамон севги юрагимда, дея жавоб қайтарди.
Ҳар доимги альбом тақдимоти маросимларидан фарқли равишда самимий суҳбат тарзида ўтган бу кеча Мунисанинг мухлислари учун қувончли таъассуротларга бой бўлди.
Муниса Ризаевани сайтимиз номидан муборакбод этамиз ва келгуси ижодига улкан зафарлар тилаймиз.
Фотолар муаллифи Тимур Кабуловга ўз миннатдорчилигимизни билдирамиз