Виа Шарқдан янги видеоклип тез кунда!

Истеъдодли ва хушовоз ижодкорлардан иборат Виа Шарқ вакиллари навбатдаги туҳфа устида иш жараёнларини бошлаб юборишди. Улар барчага таниш бўлган “Отмагай тонг” қўшиғини янгича талқинда куйлашди.  Собир Абдулла сўзи ва Тўхтасин Жалилов мусиқаси билан яратилган мусиқий асарнинг аранжировкасини Зарина Расулова бутунлай янгича талқинда сайқаллади. 

  

Куни кеча бу таронага Андрей Арутюнов режиссёрлигида видеоклип суратга олинди. Илк бор “Тоҳир ва Зуҳра” мусиқали драмасида куйланган бу қўшиқнинг янгича талқини учун тасвирга олинаётган клипда ҳам Тоҳир ва Зуҳра ёш актёр ва актрисаларнинг образларида қайта жонлантирилди. Тарихий сюжет ҳамда трекни ўз ичига олган клип оператори Равшан Муҳиддинов.

  

Тоҳир ва Зуҳра образини Аҳрор Одилов ҳамда Покизахон Файзиева ижро этди. Мазкур клипда сиз Виа Шарқ вакилларини ўзгача образда кўришингиз мумкин.  Уларнинг имиджлари устида Лидия Андре ишлаган. Демак, тез кунда севимли гуруҳингиздан янги тарона ва клипни кутиб қолинг. Ҳозирча биздан йироқлашмаган ҳолда янгиликларни кузатишда давом этинг.