Тожикистонда «Ўзбек киноси кунлари» бўлиб ўтади

Тожикистонда 19-22 май кунлари «Ўзбек киноси кунлари» бўлиб ўтиши кутилмоқда. Ўзбекистон Республикаси Кинематография агентлигининг  маълум қилишларича, «Ўзбек киноси кунлари» доирасида тожикистонлик мухлисларга ўзбек киноусталари томонидан яқинда суратга олинган «Илҳақ», «Рангсиз тушлар», «Халқ юраги», «Ҳамкорлик бўйича навбатчи», шунингдек ўзбек киноси нодир дурдоналарига айланган «Келинлар қўзғолони», «Сирли сандиқ» сингари фильмлар намойиш қилинади. «Ўзбек киноси кунлари»нинг очилиши 19 май куни Душанбе шаҳридаги «Наврўз» саройида бўлиб ўтади. Анжуман дастуридан ўзбек киноижодкорлари билан учрашувлар, ўзаро ҳамкорлик лойиҳалари, тарихий обидаларга саёҳат ва бошқа кўнгилочар тадбирлар ўрин олган.