"Бунёд шоу" концерт дастури бўлиб ўтди
"Ниҳол" мукофоти совриндори Бунёдбек Саидов мухлислари учун байрамона шоу тайёрлади. Маълумки, хонанда йилнинг сўнгида анъанага айланган "Бунёд шоу" концерт дастурини ўтказиб келади. Бу сафар бу дастур Хоразмда эмас, балки пойтахтимизда ташкиллаштирилди. "Бунёд шоу" 7 декабрь куни "Зарафшон" концерт залида бўлиб ўтди. Дастур учун хонанда 20 та қўшиқ тайёрлади. Асосий қисмидан эса янги композициялар ўрин олган. Шу билан бирга сара ва хит қўшиқлар ҳам ижро қилинди. Концертда нафақат Бунёдбек Саидов, балки, ўзбек санъатининг ёрқин намоёндалари ҳам ташриф буюришди ва иштирок этишди. Жумладан Маҳмуд Намозов, Улуғбек Раҳматуллаев, Абдурашид Йўлдошев, Достон Убайдуллаев, Манзура, Ҳулкар Абдуллаева, Дилноза Исмияминова ва бошқа қатор хонандалар мухлисларини топиб улгарган дилга яқин қўшиқларини куйлаб, яқинлашиб келаётган айём билан барчани қутлашди. Рақсларни "Шодиёна" рақс ансамблининг лобар қизлари ижро қилишди. Бундан ташқари Хоразмдан ташриф буюрган маҳоратли раққосалар ҳам иштирок этишди.
