"Темур" фильмининг саундтреки намойиш этилди
Режиссёр Аюб Шаҳобиддинов раҳбарлигида суратга олинган "Темур" фильми яқин кунларда катта экранлар юзини кўради. Зиёда ва Шаҳриёр томонидан ушбу картина учун ижро этилган "Ватан" таронаси аввалроқ премьера қилинган эди. Бугун эса видеолавҳалар билан бойитилган саундтрек намойиш этилди. Мазкур фильмга қизиқиши ортиб бораётган кино ихлосмандлари учун фильм саундтреки айни муддао бўлди. Саундтрекнинг трек қисми ҳам, сюжет қисми ўрнидаги видеолавҳалар ҳам бир бири билан ҳамоҳангликда яратилган. Эслатиб ўтамиз, Нодир Мўминов режиссёрлигида тасвирга олинган фильмда Рустам Саъдуллаев, Беҳзод Муҳаммадкаримов, Саят Эсимбетов, Игорь Жижикин, Фурқат Файзиев, Раъно Зокирова, Рихси Иброҳимова, Шоҳруҳ Ҳамдамов ва бошқа кўплаб актёр ва актрисалар қатнашишган. Қўшиқ муаллифлари эса Гулбаҳор Мўминова ва Ренат Собиров. Умид қиламизки, фильм ҳам, саундтрек ҳам барчага манзур келади. Яқин кунларда эса кинопремьерадан махсус репортажни кутиб қолинг.