Манзуранинг янги альбом тақдимоти ва 2015 йилги илк концерт дастури. Видео
Бугун пойтахтимиздаги Discovery дискдўконида кўплаб мухлисларга эга, эстрадамизнинг энг ёрқин юлдузларидан бири Манзуранинг янги альбом тақдимоти бўлиб ўтди. Энг ашаддий мухлислар, санъаткорлар ва оммавий ахборот воситалари ҳодимлари таклиф этилган тақдимотга Манзура ҳар доимгидек бетакрор кўринишда ташриф буюрди.
Тақдимотда хонанда бугунги кундаги ижодий янгиликлари, бўлиб ўтган концерт дастури ва келажакдаги мақсадлари ҳақида маълумотлар берди. Шунингдек, унга яқиндан ёрдам берган ҳар бир ижодкорга, яъни бир неча йилдан бери елкама-елка ижодий ҳамкорлик қилаётган стилист Федя, дизайнер Ҳилола Шер ҳамда Наримон Григорьянга ўз раҳматларини айтиб, унинг ҳар бир ижод маҳсулларини мухлисларига етказишда яқиндан кўмакчи бўлаётган журналистларини ҳам бирма-бир ёнига чорлаб, миннатдорчилик билдирди.
18 йиллик ижоди акс эттирилган илк яккахон концерт дастури, барча видеоклиплари ҳамда аудио альбомини алоҳида-алоҳида диск кўринишида мухлисларига армуғон этган хонанда бугунги тақдимотнинг маликасига айланди, десак муболаға бўлмайди.
Манзурани бугунги кун билан муборакбод этиш учун эстарадамиз юлдузлари Улуғбек Раҳматуллаев, Самандар Ҳамроқулов, Ирода Дилроз, Ойбек Алимов (Ойбек ва Нигора) ҳамда Дилшодбек Каттабековлар ташриф буюришди.
Қолаверса, бошқалардан ажралиб турувчи истеъдоди ва ижодининг мухлислари бўлмиш фан клуби аъзоларининг фаол иштрокини алоҳида таъкидлаб ўтишимиз лозим.
Янги альбомлар тақдимоти билан севимли хонандамиз Манзурани сайтимиз номидан чин дилдан қутлаймиз ва келгуси ижодига мувафақиятлар тилаб қоламиз.