“Вақт”... Ҳаётда содир бўлган реал воқеаларни жонлантирган фильм. Тез кунда премьера
Ёш ижодкорлар томонидан яратилаётган янги кинокартина тез кунларда катта экранларга чиқиши кутилмоқда. Бугунги кундаги муаммоларни ўз сюжетида акс эттирган, ҳаётий воқеаларга асосланган янги фильм “Вақт” дея номланган.Нима учун вақт?... Вақт инсон ҳаётининг ҳар бир дақиқаси, ҳар бир они ҳисобланади. Вақтни қандай тақсимлаш ва уни нималарга сарфлаш эса ҳар бир инсон олдидаги энг мураккаб жараёндир. Мураккаблиги шундаки, кўпчилик умрнинг қадрига етмай, вақтини беҳуда ўтказади, сўнг эса ҳаёти ўтиб кетганини сезмай қолади.
Фильм ижодкорларининг олдига қўйган мақсади, бугунги кунда айрим ёшлар тўғри йўлдан адашиб, гиёҳвандлик, безорилик каби иллатларга ўралашиб қолаётганлари ва бу ёмон ҳолатларга олиб келаётганини кўрсатиб, ёшларга ҳаётнинг қадрига етишлари, ўзаро муносабатларда самимийлик, инсонийлик каби фазилатларга кўпроқ эътибор беришларини уқдиришдан иборат эди.
Трагик мелодрамма жанрида суратга олинган мазкур картина Нона таҳаллуси билан танилган Нодира Муродхўжаева режиссёрлигида яратилган бўлиб, унда бош ролларни ёш актёрларлар иштрок этишган. Бир неча видеоклиплардаги роллари билан назарга тушган умидли ижодкор Шароф Шарапов, Лайли Гусейнова ҳамда Мардон Отажоновлар асосий образларни талқин этишган. Шунингдек, таниқли актёрлардан Элёр Носиров, Барно Қодирова, Гулҳумор Абдуллаева, Сайёра Назирова, ёш хонанда Жаҳонгир ҳамда “Эътироф-2014” мукофоти совриндори, раққоса Шодиёра Омоновалар иштрок этишган.
Фильмни тасвирга олишда операторлик вазифасини Шерзод Умаров бажарган. Айни кунда овозлаштириш ишлари олиб борилаётган картинанинг монтаж жараёнига Асадилла Зияхаджаев режиссёрлик қилган.
“Вақт” кинофильми режиссёри Нонанинг айтишича, ҳаётда содир бўлган реал воқеаларни жонлантирган мазкур фильм, кимнинг хотирасига бағишлангани премьера куни маълум қилинади.
Бугун эътиборингизга суратга олиш жараёнлари билан боғлиқ фоторепортажни тақдим этамиз. Яқин кунларда премьерани кутиб қоламиз.
