Сардор Мамадалиев янги альбомини тақдим этди
Яқиндагина "Истиқлол" санъат саройида яккахон концерт дастурини тақдим этган Сардор Мамадалиев мухлислари учун яна бир туҳфани сайтимиз орқали ҳадя этмоқда.
"Кўнглимда бир ёр" дея номланган концерт дастури билан бир номдаги альбом Сардор Мамадалиев томонидан эксклюзив равишда биринчилардан сайтимизга тақдим этилди. 15 та қўшиқ жой олган альбом ичидаги 13 та тарона концертда илк марта янграган ижод намуналаридир.
Альбомдаги ҳар бир тарона ҳар куни сайтимиз орқали эътиборингизга ҳавола этилади. Бундан ташқари, мазкур альбомдан жой олган қўшиқлардан бири "Ўзбегим Таронаси" радиоси орқали премьера қилинади.
Ижодий жамоа келишган ҳолда "Сени бугун кўрмасам бўлмас" номли таронанинг танго талқинда яратилган вариантини танлаб олди. Иқбол Мирзо қаламига мансуб шеър ва Сардор Мамадалиев мусиқаси асосида тайёрланган қўшиқ 24-ноябрь куни соат 17:20 да ФМ 101.00 тўлқини орқали тингловчиларга тақдим этилади.
Сардор Мамадалиевнинг маълум қилишича, бу таронага тез кунларда видеоклип ҳам суратга олиш режалаштирилган. Оригинал сюжетга эга клип ҳақида батафсил маълумотларни сир сақлаган хонанда бу борада Нодир ва Хуршид Собировлар билан ҳамкорлик қилишини айтиб ўтди.
Сардор Мамадалиев ижодидаги янги тароналарни ҳар куни сайтимиз орқали қарши олинг!