Шаҳзода ва Шоҳруҳхондан мега премьера!
Бу икки ижодкор ҳам бугунги кунда санъат оламида анча профессионал ва минглаб мухлисларнинг севимли хонандаларига айланиб улгуришган. Мафтункор Шаҳзода ва Шоҳруҳхон аввалги дуэтдан илҳомланган ҳолда яна биргаликда янги қўшиқ яратишди.
Бу сафарги дуэт "Унутолмадим" дея номланиб, гўзал туйғу бўлган севги-муҳаббат мавзуси асосий ғоясидир. Қизиқарли томони шуки, бу қўшиқнинг матнини Шоҳруҳхоннинг мухлислари ёзган экан. Мусиқасини Шоҳруҳхоннинг ўзи басталаган бўлиб, аранжировкаси доимий ҳамкори Жасур Бадалбоев томонидан тайёрланган.
Бу дуэт Шоҳруҳхоннинг эртага старт оладиган ва Шаҳзоданинг май ойида ўтказиладиган концерти олдидан мухлислари учун муносиб туҳфа бўлади. Қалбга яқин сатрлар ва ёқимли оҳанг ҳар қандай мухлиснинг юрагини забт этиши аниқ.
Минглаб мухлислар томонидан интиқиб кутилган дуэт "Ўзбегим Таронаси" радиоси орқали премьера сифатида тақдим этилди. ФМ 101.00 тўлқини тингловчилари катта олқишлар билан қарши олган дуэт таронага бир овоздан аъло баҳо беришди.
Эртага, яъни 15-февраль кунидан бошланадиган концерт дастурида Шаҳзода ҳам иштирок этиши кутилмоқда. Шаҳзода эстрада оламида эркак хонандалардан Шоҳруҳхон ижодини ҳурмат қилишини алоҳида таъкидлаб ўтганди. Ўз навбатида Шаҳзоданинг самимийлиги ва ижодий ютуқлари ҳам Шоҳруҳхон учун қадрли эканлиги сир эмас.
Ҳар иккала хонанданинг ҳам концерт дастури аъло ўтишига омад тилаймиз! Хозир эса Шаҳзода ва Шоҳруҳхон ижросидаги янги "Унутолмадим" дуэтини тинглаб, завқланинг!