«ОНАМ БИЛМАСИН» ФИЛЬМИНИНГ ПРЕМЬЕРАСИ БЎЛДИ
Аввал хабар берганимиздек, 2 май куни “Алишер Навоий” номли кино саройида режиссёр Жаҳонгир Аҳмедов суратга олган “Онам билмасин” картикасининг ёпиқ премьераси бўлиб ўтди.
Мана эндиликда 3 майдан бошлаб барча кинотеатрларда намойиш этилишига старт берилди. Ёпиқ премьерада барча кино ижодкорлари ташриф буюришди. Улар бирма-бир таништирилди. Энг қизиқарлиси премьерадан аввал, иқтидорли ёшларнинг қизиқарли саҳна кўринишлари ва умидли хонандларнинг чиқиб қўшиқ куйлагани бўлди. Бу барчага бирдек манзур келиб, юқори кайфият бахш этди.
Шуни алоҳида таъкидлаб ўтиш лозимки, фильмда айни кундаги кўплаб оилаларда рўй берувчи воқеа-ҳодисалар ва муаммолар юмор орқали талқин этилган. Айниқса, кўтарилган мавзу юзасидан масаланинг ечимларигача кўрсатиб берилиши картинанинг тарбиявий аҳамиятга бойлигини ҳам намоён этди.
Фильмда она ва қарқарали қайнона образини Ўзбекистонда хизмат кўрсатган артист Саида Раметова юксак маҳорат билан ижро этган.
Шунингдек, ота образида Ўзбекистонда хизмат кўрсатган артист Матёқуб Матжонов келинларига меҳрибон қайниота образини қойилмақом қилиб талқин этган.
Уч келин образида намоён бўлган Муножат Алимбоева, Наргиза Салмонова ҳамда Шаҳзода Муҳаммедоваларнинг ҳам актрисалик қобилиятига тан бермай илож йўқ. Айниқса, бу овсинларнинг Европа сайёҳати ҳақидаги хабарни деб турмуш ўртоқларини не куйга солишларини айтмайсизми!
Хуллас томошабин бир зумгада бўлсин бирор бир кадрдан кўнгли тўлмай, “Бу жойини мана бунақа қилишибти...” деган эмас. Бутун залдаги томошабин фильм воқеаларининг ривожида хандон отиб кулиб, олқиш-у, қарсаклар билан сийлаб турди. Айниқса, фильм якунида Матёқуб Матжоновнинг ўғилларига қарата, “Сенларни хотинларинг хотин, нима бизники ўтинми?!” деган жумласига барча томошабинларнинг олқишидан “Алишер Навоий” номли кино саройи ларзага келди.
Ўтган галги хабарларимизда, “Шу кунга қадар Жаҳонгир Аҳмедовнинг деярли барча фильмлари тезда халқ орасида оммалашиб кетган!” деб иқтибос келтирганимизга филм премьерасидан сўнг асло муболаға қилмаганимизга амин бўлдик.
