“Мирзо” театрининг катта концерт дастури тафсилотлари
Инсонларга баҳорий кайфият улашиш, юзига кулгу ва табассум ҳадя этишни ҳар ким ҳам уддасидан чиқолмайди. Ҳалқимиз ардоғида бўлган Мирзабек Ҳолмедов бошчилигидаги “Мирзо” театри эса мана йигирма йилдирки, ҳар йили баҳорнинг илк ойида ўзининг катта концерт дастурини намойиш этади. 1 апрель Кулгу ва хазил куни арафасида тақдим этиладиган мазкур дастур учун катта тайёргарлик кўрилиб, ижодий жамоа мухлисларга яхши кайфият улашиш мақсадида тинимсиз меҳнат қилишади.
Бу йил 30, 31 март ҳамда 1, 2, 3 апрель кунлари “Истиқлол” санъат саройида бўлиб ўтаётган “Хаш-паш дегунча” номли катта дастурга нафақат пойтахтликлар, балки турли вилоятлардан меҳмонлар ташриф буюришмоқда. Концертга ташриф буюрган ҳар бир томошабиннинг кўзида катта қизиқиш ва соғинч билан бу дастурни кутишгани сезилиб турди.
Саҳнада Шукрилло Исроилов, Валижон Шамшиев, Ойбек ва Улуғбек Ҳолмедовлар, Ботирхўжа Имомхўжаев, Халимаҳоним, Маъмур Ҳолмедовлар қизиқарли ва юморга бой саҳна кўринишлари намойиш этиб, томошабинлар диққатини тортишди. Мирзабек Ҳолмедовнинг хангомалари эса бутун залга кўтаринки кайфият бағишлади.
Ҳар йилги концерт дастурининг энг кулминацион нуқтасига айланган Мирзабек Ҳолмедовнинг оналарни улуғловчи монологи бу сафар ҳам мухлислари қалбига етиб борди. Онасидан йироқда меҳнат қилаётган фарзанд ҳақидаги мазкур монолог кўпчиликнинг кўзини намлади, десак муболаға бўлмайди.
Концертнинг яна бир энг ёрқин жиҳати дастур меҳмони водийлик санъаткор Тоҳир Маҳкамов ўз куй-қўшиқлари билан барчани ҳушнуд этгани бўлди.
Бугун дастурнинг хазил мутойибага бой икинчи куни, яна олдинда уч кунлик концерт кунлари турибди. Ижодий жамоага чарчоқ нималигини билмасдан ўтказаётган дастурлари мувафаққиятли якунланишини чин дилдан тилаб қоламиз!
Фотолар муаллифиТимур Кабуловга ўз миннатдорчилигимизни билдирамиз
