1,5 йил кутилган "Снайпер" фильмининг тақдимоти ўтказилди

Алишер Навоий номли киносаройида режиссёр Озод Шамс томонидан суратга олинган "Снайпер" номли картинанинг премьераси бўлиб ўтди.
Фильм тақдимоти 1,5 йил кутилди ва кутилганига арзийдиган тантанали равишда ўтказилди. Махсус "Қизил йўлакча" ташкил этилди. Унда халқимиз севган бошловчи Жаҳонгир Хўжаев фильм ижодкорларини мусиқа садолари остида қарши олди. Тақдимот маросими киносаройнинг катта залида давомланди. Бошловчилар Шох Алимович ва Ойхон Ифорзода картина ижодкорларини саҳнага таклиф этишди. Бирма бир томошабинларга таништириб ўтишди. Тақдимотга фильмда ўзининг такрорланмас образи билан иштирок этган Туркиялик актёр Доғукан Эрдем Кутлу ҳам қатнашди ва саҳнада халқимизга илиқ фикрлар билдириб, барчани хушнуд қилди.

"Снайпер" ҳақида тўхталадиган бўлсак, бу фильмда бош ролларни маҳоратли актёр Улуғбек Қодиров ва истеъдодли актриса Бону Нур ижро қилган. Шунингдек, фильмда Саида Раметова, Матёқуб Матчонов, Беҳзод Муҳаммадкаримов, Доғукан Эрдем Кутлу ва бошқа кўплаб актёр ва актрисалар иштирок этишган. Ўткир сюжетли драма жанридаги мазкур картина орқали режиссёрнинг томошабинларга айтмоқчи бўлган гаплари талайгина. Улардан бири ватанга бўлган муҳаббат! Ватан севгиси ҳар бир инсон учун бошқа бир инсонга ёки нарсага бўлган севгидан кучлироқ. Бу сўз фильмда ҳам ўз исботини топган. Тақдимот маросими жараёнида ижодкорлардан фильмдаги воқеалар ривожини сўраганимизда, бир овозда ошкор этмасликларини билдиришди. Фақатгина фильмни томоша қилган томошабингина бу кино асар воқеаларини кўриши ва кузатиши мумкин бўлади. Шундай экан, 4 мартдан бошлаб, юртимиз кинотеатрларида намойиши бошланган мазкур картинани албатта томоша қилинг ва ўзингиз барчасига гувоҳи бўлинг