“ЗУВОЛА” АСЛ ҚЎШИҚЛАР МИЛЛИЙ ТАНЛОВИНИНГ ЯКУНИЙ ГАЛАКОНЦЕРТИ БЎЛИБ ЎТДИ
Ўзбекистон Республикаси Маданият вазирлиги ҳамда “Ўзбекконцерт” давлат муассасаси томонидан жорий йилнинг 25 январь куни Республикада илк маротаба “Зувола” асл қўшиқлар миллий танлови эълон қилинган эди. Танлов учун Тошкент шаҳри ва вилоятларда ижод қилиб келаётган жуда кўплаб хонандалар, ижодкорлар турли жанр ва йўналишда янги қўшиқлар йўллашган. Мазкур танлов юзасидан шу кунга қадар бир неча маротаба ҳакамлар ҳайъати йиғилишлари ташкил этилди ва бунда шоирлар, бастакорлар ҳамда профессионал хонандалар томонидан танловга юборилган қўшиқларнинг матни, мусиқаси ҳамда хонандаларнинг ижро маҳоратига катта эътибор қаратилди. Натижада юборилган қўшиқлар орасидан танловда қатнашишга арзийдиганлари саралаб олинди. Танловга келиб тушган қўшиқлар ичидан энг саралари деб топилган тароналар муаллифларига диплом ва пул мукофотлари топширилди. 21 октябрь куни Халқлар дўстлиги санъат саройида ушбу танлов ғолиблари иштирокидаги якуний галаконцерт ташкил этилди. Унда ғолиблар ўз тароналари билан томошабинларни хушнуд қилишди. Концертда Маданият вазирининг биринчи ўринбосари Озодбек Назарбеков ҳам иштирок этди ва халқимиз соғинган қўшиқларини ижро қилиб, барча концерт иштирокчиларини қўллаб қувватлади.
