БУНЁДБЕК САИДОВДАН ЯНГИЧА ТАЛҚИН

Айни пайтда мухлислари эътиборига дардли ва сокин қўшиқларни тақдим этиб келаётган истеъдодли хонанда Бунёдбек Саидов “Алдоқчи” деб номланган маҳзун таронасининг Remix вариантини тақдим этди. 

Ҳар бир таронаси илиқ кутиб олиниб, тингловчилар қалбидан муқим жой эгаллаб келаётган Бунёдбек Саидовнинг навбатдаги қўшиғи ҳам мухлисларга аъло кайфият баҳш этди. Гарчан изтироб, севгидан қолган алам ва дардли сатрлар билан куйланган бўлса-да, жўшқин мусиқа ритми ҳамоҳанглигида янада кўтаринкилик баҳш этади. “Алдоқчи” қўшиғининг Remix талқини радио тўлқини орқали жаранг сочиши билан кўплаб тингловчилар қўнғироқ қилиб, таронага юқори баҳо берди. Ҳатто, бир мухлис “Бу қўшиқ шундоқ ҳам юрак тўримиздан жой олган, унинг янгича талқини эса янаям ёқди!” деган илиқ тилакларини айтди. 

Ринат Собиров мусиқаси ва аранжировкаси билан яратилган қўшиқ чинданда ёқимли. Шу ўринда эслатиб ўтамиз, мазкур қўшиқнинг матни Одилбек Саиджонов қаламига мансуб. 

Жонли эфирда бошловчи Турсуной Алимова билан биргаликда уюштирилган суҳбатда хонанда кўплаб янгиликлардан бохабар этди. Шунингдек, июнь ойида мўлжалланган концерт дастурида ҳам имкон қадар 100 фоиз жонли ижро қилишга тайёргарлик кўраётганлигини таъкидлаб ўтди. Бунинг исботи ҳамда мухлислар талаб ва таклифи билан суҳбат жараёнида бир неча қўшиқларни жонли равишда куйлаб берди. Тан олиб айтиш лозим, Бунёдбек Саидовдаги Хоразмнинг ҳароратли нафаси ва ширали овози ҳар қандай юракка булоқ сувидек қуйилиб боради. 

 Сайтимизда тақдим этилган “Алдоқчи” таронасининг янгича талқинидан сиз ҳам баҳраманд бўлинг...