Лоладан кутилаётган янги клип, навбатдаги альбом ҳамда яккахон концерт дастури ҳақида

Бугунги кунда эстрадамиз юлдузи, латофатли Лола бир қатор янги лойиҳалар устида иш олиб бормоқда. Улардан бири шу кеча кундузда тасвирга олинаётган клипдир. Биз мазкур клип жараёнини яқиндан кузатиш мақсадида тасвирга тушириш майдончасига ташриф буюрдик. Қизиқарли ва юқори кайфиятда олиб борилаётган жараённи кузатар эканмиз, хонанданинг ижро маҳорати, актрисалик қобилиятига яна бир карра қойил қолдик. Шунингдек, професcионал ижодкорлардан ташкил топган ижодий жамоанинг ҳар бир вакили ҳам ўз ишини пухта бажараётганини гувоҳи бўлдик. Жараён ўртасида бўлган қисқа танаффус чоғида хонанда Лолани суҳбатга чорладик ва бир нечта саволларимизга жавоб олишга муваффақ бўлдик.

  

-Айтиб ўтишимиз лозимки, қўшиқ жудаям таъсирли яратилган. Бу таронани куйлашингизга нимадир туртки бўлдими?

-Бу қўшиқни Беном гуруҳининг вакиллари Сарвар ва Комил ёзишган. Биринчи марта тинглаганимдаёқ бу мусиқий асар менга жуда ҳам ёққан ва юрагимга яқин бўлган қўшиқлардан бирига айланган. Менимча тарона маълум бир сабабларга кўра муносабатлари узилган инсонлар учун умид бўла олади.  Қўшиқни тинглаган бундай инсонлар қалби ёришади. Қолаверса, тарона сўзлари уларга куч беради. Жавобсиз севги, жавобсиз туйғулардан азоб чекаётган инсонлар учун бу мусиқий асар яхши совға бўлди деб умид қиламан.

-Тарона сизга қанчалик яқин? Мухлислар сўнгги қўшиқларингизни шахсий ҳаётингизга боғлиқ дейишмоқда...

-Йўқ. Бу қўшиқ  менинг шахсий ҳаётимга умуман боғлиқ эмас. Шунчаки, менга қўшиқнинг мавзуси, ғояси, мусиқаси жудаям ёқди. Уни тинглаганимдаёқ шуни тушундимки, бу қўшиқ меники. Яна бир бор айтиб ўтаман, “Хабар ол” менинг барча мухлисларим, қолаверса,  ҳаёт синовларидан қийналаётган, туйғуси жавобсиз қолган инсонлар учун куйланган. Умид қиламанки, кимдадир бундай ҳолатлар юз берган бўлса, албатта уларнинг охири бахтли якун топади.

 

- Клип ҳақида тўхталадиган бўлсак, бу видеоклип билан мухлисларни қай даражада лол қолдира оламан деб ўйлайсиз?

-Билмадим... Қай даражада лол қолдиришимни албатта мухлислар ва томошабинлар баҳолашади. Олдиндан бир нарса дейиш жуда қийин. Аслида “Клипим зўр чиқади, ҳаммага ёқади” – деб олдиндан жар солишни, клипим ёки қўшиғимни “албатта хит бўлади” – деб фол очишни ёқтирмайман. Бунинг ўрнига ўз ишимни юқори савияда бажаришни, муҳаббат билан бор меҳримни бериб, ҳар бир ижод маҳсулимни  яратишга ҳаракат қиламан. Бугунги клипни суратга олишда ҳам худди шундай йўл тутишга ҳаракат қилдим.  Бундай клипни бир неча йиллардан буён тасвирга олишни ўйлаб юргандим. Бироқ бу ғояга мос келадиган қўшиқни топа олмаган эдим. Лекин “Хабар ол”ни илк марта эшитганимдаёқ кўз олдимда шу сюжетни кўрдим. Суратга олиш жараёнига қадар бўлган тайёргарликлар ҳам узоқ давом этди. Сюжет ичидаги ҳар бир  ҳолат мухлисларни таъсирлантириши ва  уларнинг юрагига кириб бориш учун кичик деталдан тортиб, ҳар бир ҳаракат устида катта жамоа: иккита режиссёр, оператор, декоратор, рассом, либослар бўйича мутахассис билан бирга иш олиб бордик.

- Ушбу клипдаги ижодий жамоангиз ҳақида ҳам алоҳида маълумот берсангиз?

- Клип режиссёрлари Санжар Маткаримов ҳамда Мансур Васати, тасвирчи Рустам Муродов. Либослар бўйича рассом Ҳилола Шер, декоратор Баҳриддин Шамсутдинов. Умуман олганда бу клипимда ҳам “Соғиндим” клипида иштирок этган ижодий жамоа билан ҳамкорлик қиляпман. Бу жамоа билан бирга ишлаш менга жуда ҳам ёқади. Чунки уларнинг ҳар бири ўз ишига масъулият билан ёндошиб, вазифаларини чин дилдан бажаришади.

- Бош роль ижрочилари ҳақида нима дея оласиз? Йигитали Мамажонов билан ҳамкорлигингиз ҳақидачи?

- Ҳа, мен бу клипда бош роль учун Алини танладим. Чунки Йигиталининг актёрлик маҳорати менга жуда ёқади. Унинг ҳар бир кинода, клипда яратган образлари ҳам ўзига ярашади. Бугунги клипдаги образ спорт билан шуғулланадиган, каскадёр бўлгани учун ҳам бу ролга Йигитали мос келди. Клипнинг бош роли учун узоқ вақт мобайнида актёрларни танладим. Бироқ бу образ учун Али жуда ҳам мос келишини тушуниб етдим. Бир томондан “Хабар ол” клипини “Соғиндим” клипининг давоми десак ҳам бўлади.

-Суратга олиш жараёнида қийналмияпсизми?

- Йўқ. Мен жуда ҳам клипни тасвирга тушириш жараёнини яхши кўраман. Ҳар бир клипимни суратга олиш жараёнини кутаман. Чунки, бу жараён менинг энг яхши кўрган энг қизиқарли жараёнларимдан биридир.

-Бу клип тахминан қачон оммага тақдим қилинади?

- Сентябрь ойининг биринчи ярмида  намойиш этишни режалаштирганмиз.

-Бундан ташқари яна қандай янгиликлар тайёрлаяпсиз?

-Янгиликларимиз талайгина. Улардан бири,  биз янги альбом устида олиб борилаётган ишларни якунлаяпмиз. Қолаверса, ноябрь ойининг 21-22-23-саналарида яккахон концерт дастуримни тақдим этаман. Ҳозирча энг асосийлари шу ва албатта тез кунда бугунги клип намойиши.

-Жавобларингиз ҳамда самимий суҳбат учун учун раҳмат. Олдинда режалаштирган ишларингизга омад тилаймиз.

Ўйлаймизки, бу клип барча томошабинларга манзур келади ва хонанда тайёрлаётган ҳар бир қўшиқ, клип, қолаверса, тез кунда тайёр бўладиган янги альбом ҳамда куз фаслида тақдим этиладиган концерт барча учун кутилмаган туҳфа бўлса ажаб эмас. Демак, биз билан бирга бўлинг ва кузатишда давом этинг.