Мақом ансамблининг “Кексалар эъзозда” номли концерт дастури бўлиб ўтди
Маданият ва спорт ишлари вазирлиги ҳамда Ёшлар маданият ва санъат маркази томонидан 14-декабрь куни “Истиқлол” санъат саройида Мақом ансамблининг “Кексалар эъзозда” деб номланган концерти ўтказилди. Ёшлар маданият ва санъат марказидан йил давомида маданият ва санъат йўналишида истеъдодли ёшларни қўллаб-қувватлаш, уларнинг иқтидорларини намойиш этишлари учун ижодий муҳит яратиш, анъаналарни тарғиб қилиш ва ривожлантириш мақсадида бир қатор янги лойиҳалар ташкил этилиб уларга минглаб аҳоли ва ёшлар жалб қилинмоқда.
“Кексалар эъзозда” номли концерт “Кексаларни эъзозлаш йили” давлат дастури ижросини таъминлаш, шунингдек кексаларнинг мароқли дам олишларини ташкил этиш ва халқимизнинг олтин мероси бўлган мақом саъати анъаналарини янада ривожлантириш, асраб-авайлаш ва ёш авлодга етказиш, мақом ихлосмандларини орасида тарғиб этиш ва оммалаштириш мақсадида ташкил қилинди.
Концерт дастурида мақом санъатининг юртимиздаги энг сара ижрочилари ҳамда элимиз ардоғидаги устоз санъаткорлар иштирок этдилар. Жумладан, Ўзбекистон халқ артисти Абдуҳошим Исмоилов раҳбарлигидаги “Мақом” ансамбли, Ўзбекистон халқ ҳофизлари Бекназар Дўстмуродов, Ўлмас Саиджонов, Абдунаби Иброҳимовлар, Ўзбекистон халқ артистлари Зулайҳо Бойхонова, Гулсанам Мамазоитова, Ўзбекистонда хизмат кўрсатган артистлар Аҳмаджон Дадаев, Шарофат Тожибоева, Матлуба Дадабоева, Тўлқин Жабборов, Замира Суюнова, Элмурод Аҳмедов, Фурқат Ашуралиев ҳамда бошқа таниқли устоз ва умидли ёш санъаткорлар иштирок этди.
Дастур давомида Ўзбекистон бадиий жамоалари бирлашмасининг “Наврўз”, “Навбаҳор”, “Лазги” номли рақс ансамбллари раққосалари иштирок этди. Дастурдан халқимиз севган “Муножот”, “Эй сабо”, “Сараҳбори оромижон”, “Нозларинг сани” “Эй санам”, “Тановар”, “Мустаҳзод каби бебаҳо асарлар ҳам ўрин олди.
Мазкур дастурга меҳнат фаолиятида муносиб ютуқларни кўлга киритган нуроний ва фаҳрийлар, санъаткор устозлар, маданият ва санъат соҳасидаги таълим муассасалар ҳамда ташкилотдан вакиллари меҳмон бўлишди.
