“Қайсаргинам” фильмининг намойиши бўлиб ўтди
Аввал хабар берганимиздек ёш ва иқтидорли режиссёр Азамат Ахроров ўзининг навбатдаги фильмини томошабинлар ҳукмига ҳавола этиш ниятида катта тайёргарлик ишларини олиб бораётган эди. 12-декабрь куни “Алишер Навоий” номидаги киносаройида барча бирдек орзиқиб кутган мазкур картинанинг премьераси ўтказилди. Мазкур фильмдан биринчилар қаторида баҳраманд бўлишни истаган кино ихлосмандларининг охири кўринмасди. Об-ҳавога қарамай, киносарой шу қадар гавжум эдики, уларни кўриб, бу ҳам режиссёрнинг бир ютуғи деб баҳоладик.
Зал томошабинлар билан лиқ тўла. Жой топа олмай хуноб бўлганлар сони ҳам кўпчиликни ташкил этади. Фильм намойишига киноижодкорларнинг ҳамкасблари, ОАВ вакиллари ҳамда уларнинг ашаддий мухлислари ташриф буюришди. Дастурни истедодли актриса, серқирра ижодкор Шаҳзода Муҳаммедова олиб борди. Аввалига саҳнага ёш ва умидли хонанда Ҳадича келганларни ўз қўшиғи билан хушнуд этди. Ана ундан сўнг картининг ижодкорлари саҳнага таклиф қилинди ва бирма-бир таништирилди. Ана шундан сўнг фильм намойиши бошланди.
Фильмнинг бош қаҳрамонлари Жасур ва Жасминадир! Жасур ёлғиз она қўлида тарбия топган, шу сабабдан ҳаётга озгина енгил қарайди. Кўп вақтини ўйин – кулгида ўтказади. Онасининг нияти тезроқ ўғлини уйлантиришдир. Жасмина ҳам Жасурдан қолишмайди. Чўрткесар, ўз фикрига эга. Жасур билан унинг илк учрашуви жанжалдан бошланади ва жанжал билан тугайди.
Фильм воқеалари қандай якунланди? Картина қаҳрамонларининг тақдиричи? Бу саволларга аниқ жавобни фильмни томоша қилиб билиб оласиз. Азамат Ахроровнинг “Қайсаргинам” картинаси 13-декабрьдан бошлаб юртимиз кинотеатрларида намойиш этилмоқда.
Эслатиб ўтамиз, бош ролларда Муҳаммад Исо Абдулхайиров, Муқаддас Ҳолиқова, Азамат Аҳроров, Суғдиёна Азимова, Йигитали Мамажонов, Талъат Йўлдошев ва бошқалар иштирок этган. Картинанинг сценарий муаллифи Аҳрор Нурмуҳаммад.
