Серқирра ижодкор Шерзод Бин режиссёрликка қўл урди!

Асосан пародиялари ва комик роллари билан мухлислар қалбидан жой эгаллаган серқирра ижодкор Шерзод Бин режиссёрликка қўл урди. Мелодрамма жанрида суратга олинаётган “Учрашгунча” деб номланган янги фильм Шерзод Бин бошчилигида тасвирга олинмоқда. Дебютант режиссёр бўлишига қарамай у ўз ишига ўта жиддий ёндашмоқда. Буни актёр ва актрисалар ансамблидан билиб олиш мумкин. Бош ролларни кўпгина образлари билан мухлислар муҳаббатига эришган, халқимиз назарига тушган актриса Асал Шодиева ҳамда  ёш ва истеъдодли хонанда, актёр Жаҳонгир ижро этишмоқда. Бундан ташқари картинада Муҳаммад Исо Абдулхайиров, Раъно Ярашева, Лола Элтоева, Асқар Ҳикматов ва ёш ижодкор Яхё такрорланмас образларни яратишмоқда. Ушбу фильм ғояси Жамшид Хожиниёзовга тегишли. Сценарий муаллифи Жўрабек Рўзиметов.

“Бугунги кунда фильмларимиз мавзуси бир хил яъни севги муҳаббатга боғланиб қолган. Ундаги воқеалар ҳам худди шундай. Қаҳрамонларнинг бири бой, иккинчиси камбағал. Бу тафовут туфайли улар бир-бирига етиша олмайди ёки турли норозиликларга учрайди. Аслида бойми камбағалми ҳаммамиз гўзал ҳаётда яшаймиз. Биз мазкур картинамизда юқорида айтган ҳолатларни четлаб ўтишга аҳд қилдик. Ўйлаймизки, фильм мухлисларимизга манзур келади. Шу ўринда бизни қўллаб турган барча устозларимиз ва яқинларимизга миннатдорчилик билдираман” – дейди режиссёр Шерзод Бин сайтимизга берган маълумотларига қўшимча қилиб.

Бир нечта фильмларнинг режиссёри Иқбол Мелиқўзиев бу кино асарда бадиий раҳбар ва операторлик вазифасини бажармоқда. Демак, ўзбек киноси яна бир ижод маҳсули билан бойиш арафасида. Биз эса ижодий гуруҳга омад тилаган ҳолда воқеалар ривожини кузатамиз. Биздан йироқлашманг энг қайноқ хабарлардан баҳраманд бўлинг.