«Жаҳолатга қарши маърифат» мавзусидаги тадбир бўлиб ўтди
Бугун пойтахтимиздаги Ўзбекистон миллий кутубхонасида Ўзбекнаво эстрада бирлашмаси томонидан «Жаҳолатга қарши маърифат» мавзусидаги маънавият соати бўлиб ўтди.Тадбирни Ўзбекистон Республикаси Маданият ва спорт ишлари вазири Б. Аҳмедов очиб бердилар. Ушбу тадбирда санъаткорлар, ОАВ вакиллари билан бирга Республика маънавият тарғибот маркази раҳбари, сиёсатшунослик фанлари доктори Қаҳрамон Қуронбоев ҳамда Ўзбекистонда хизмат кўрсатган журналист, таниқли сиёсий шарҳловчи Қобилбек Қаримбековлар иштирок этдилар.
“Муҳтарам президентимиз таъкидлаганларидек, бугун дунёда ядро полигонларидан кўра мафкура полигонларидаги курашлар хавфлироқ тус олмоқда. Узоқ ва яқин давлатларда содир бўлаётган нотинчликлар, турли диний мафкуравий хуружлар ҳар бир кишини ҳушёр бўлишга ундайди. Айниқса ёшлар онгини ва қалбини зарарли оқимлар таъсиридан асраш юртимиздаги тинчлик, фаровонлик бардавом бўлишини таъминловчи муҳим омиллардан бири десак адашмаймиз.
Ёшлар бугун кимга кўпроқ эргашади, тақлид қилади? Албатта санъаткорларга. Шунинг учун бугунги санъат вакили ҳар жиҳатдан , хусусан сиёсий жиҳатдан ҳам билимларини ошириб бориши талаб этилади. Биз ана шундай талабдан келиб чиқиб мазкур маънавият соатини ташкил этдик” – дея Баходир Ахмедов ўз фикрларини баён қилдилар ва Республика маънавият тарғибот маркази раҳбари, сиёсатшунослик фанлари доктори Қаҳрамон Қуронбоевга сўз навбатини берилиб у киши ҳам хонандаларга мавзу доирасидаги ўз фикрларини баён этиб ўтдилар.
Бундай тадбирларда иштирок этган ҳар бир хонанда ўзи учун тегишли хулосаларни чиқариб олдилар. Ана ундан сўнг навбат Ўзбекистонда хизмат кўрсатган журналист, таниқли сиёсий шарҳловчи Қобилбек Қаримбековга берилди. Улар ўз маърузаларида шундай аниқ фактлар билан қўшни давлатлардаги нотинчликлар, турли хил бузғунчи ғоялар қурбонига айланганлар, юртимизда диний-мафкуравий ғояларга қарши олиб борилаётган ишлар юзасидан маълумотлар бериб ўтдилар. Мазкур тадбирда иштирок этган ҳар бир иштирокчи ўзи учун кўпгина саволларига жавоб олди.
