Эстрадамиз юлдузлари ёз мавсумини қандай ва қаерда ўтказмоқдалар
Ёз мавсуми саёҳат қилиш, анчадан бери режалаштирилган таътил онларини мароқли ўтказиш ва ҳордиқ олиш учун айни вақти, десак адашмаймиз. Ижтимоий тармоқларни кузата туриб, таниқли юлдузларнинг мухлислари уларнинг севимли ижодкорлари қаерда дам олаётганларидан хабардор бўлиб борадилар. Бу эса уларнинг қизиқишини янада ошириши табиий. Шуни инобатга олган ҳолда, эътиборингизга тақдим этаётган хабарларимиз орқали қайсидир санъаткорлар оиласи, яна кимлар эса дўстлари билан саёҳатга чиққанидан хабардор бўлишингиз мумкин. Шу билан бирга, таътил онлари мухрлаган фотосуратларни томоша қилинг.
Мафтункор Шаҳзода оиласи билан Европанинг жанубида, денгиз бўйида жойлашган Монако давлатида мазмунли ҳордиқ олмоқда. Фарзандлари Салиҳ ҳамда жажжигина Ҳалид билан бирга ўтаётган энг ёрқин дақиқалари фотоларда акс эттирилган.
"Шаҳзод" ансабли яккахони Рашид Ҳолиқов эса шоу бизнес оламида ижод қилаётган бир қатор яқин дўстлари билан бирга океан ортига саёҳатга чиққан. Нью Йорк, Маями энди эса Колифорнияда таътилни давом эттираётган Рашид Ҳолиқов ўз фотолари билан бирга қисқа видоларини ҳам ижтимоий сайтларга жойлаштирмоқда.
Райҳон ҳамда "SADO" ансабли яккахони Акбар биргаликда оила ва фарзандлари билан Анталияда мароқли ва мазмунли вақт ўтказишмоқда. Уларнинг орасидаги бир неча йиллик дўстлик муносабатлари оилавий ришталарга уланиб кетган.
Хушовоз хонанда Алишер Рўзметов эса волидасини ҳушнуд этиб, Туркиянинг бир неча шаҳарларини зиёрат эттирмоқда. Истанбул ва Анталия шаҳарларида бўлган хонанда яна бир неча кунлик саёҳатни бошқа шаҳарларда ҳам давом эттириш ниятида.
Азиз Ражабий ҳам оиласи билан Туркия сафарида бўлишди. Фарзандларининг таътил кунларини ажойиб ва узоқ вақтлар ёқимли хотираларга айлантириб, бир дунё таассуротлар билан қайтишди.
Эстрадамизнинг ёрқин намоёндаси Зиёда турмуш ўртоғи Элдор, ўғилчаси ва оила аъзолари билан Туркияда "Bellis Deluxe Hotel" меҳмонхонасидан жой олишган.
"Шарқ" вокал чолғу ансамбли солистлари Сарвар ҳамда Татяна ҳам Туркия бўйлаб кезишмоқда. Истанбулнинг энг кўзга кўринган масканларини томоша қилиб, энди Анталияга Оқ денгиз бўйига йўл олишди.
Шоу бизнесимизнинг яна бир ёрқин вакиласи Муниса Ризаева ёз мавсумидаги таътил онларини Франциянинг Кан шахрида ўтказишни ҳуш кўради. Ҳар йили шу манзилда яқин дугоналари билан ҳордиқ оладиган хонанда бу йил бу анъанани бузиб оила аъзолари билан таътилни ўтказмоқда.
Барча юлдузларимизга мароқли ҳордиқ онларини тилаймиз ва “Яхши дам, меҳнатга ҳамдам” деганларидек юртимизга қайтишганидан сўнг яхши ижод намуналарини кутиб қоламиз.