Фарҳод ва Ширин жуфтлигининг асл мухлислари учун унутилмас кун. Концертдан батафсил
Муҳташам ''Истиқлол'' санъат саройи яна санъат иҳлосмандлари билан тўлди. Икки кунлик илк яккахон концерт дастурини намойиш этаётган Фарҳод ва Ширин дуэт гурухининг асл мухлислари унутилмас дастур томошасининг гувоҳи бўлдилар. Мусиқа садолари остида пардалар очилиб, саҳнада созандалар гурухи ҳамда оппоқ рояльда куй чалаётган Фарҳод кўринди. Ширин саҳнага чиқиб келиши билан ''Дилим пора'' қўшиғи билан концерт бошланиб, хонандалар ўзларининг энг севимли куй-қўшиқларини мухлисларига армуғон этдилар.
''Азизим'', ''Севгилим'', "Ёлғизим'', ''Қизғонаман'', "Айтинг оғажон'' каби қўшиқлари ''Паризода'' рақс ансамбли раққосалари ва кичик сахна кўринишлари билан намойиш этилди. Ижодкорлар саҳна ортига ўтишганида актёр ва сўз устаси Санжар Шодиев ўз ҳангомалари билан томошабинларни ҳушнуд этди.
Иккинчи блок ''Нечун'' таронаси билан бошланиб, ''Кулиб туриб'', ''Юр мухаббат, кетдик бу ердан'' композициялари билан давом этди. Comedy.uz резидентларининг ҳазил мутойибалари, қолаверса ёш хонанда Афсонанинг чиқиши дастурга файз киритди.
Ота ва оналарга аталган қўшиқни ижро этгач, Фарҳод ва Ширин волидаларига гулдасталар тутишди. Ҳаяжонли ҳолатдан кейин эса келинчаклар учун аталган янги композиция куйланиб саҳнани тўлдириб турган келинчаклар таронанинг таъсир жиҳатини оширди.
Ранг-баранг чироқлар, миллий арнаментли декорациялар, хонандалар либосларининг бир-бирига мослиги, умумий қилиб айтадиган бўлсак, ҳар бир чиқишнинг ўзига ҳослиги илк концерт дастурининг омадли ўтаётганидан дарак. Ташриф буюрган меҳмонлар орасида таниқли санъаткорларнинг борлиги эса бу омадли жуфтликнинг ижодига санъат аҳли ҳам бефарқ эмасликларини билдиради.
Ўз олдига қўйган мақсадларига эришганликлари ва дастурни файзли ўтгани билан Фарход ва Ширинни сайтимиз номидан муборакбод этамиз.
